Монголын Урчуудын Эвлэлийн нэрэмжит шагналт, Монгол Улсын Соёлын тэргүүний ажилтан, зураач С.Энх-Амгалангийн “Мэдрэмж-3” бие даасан үзэсгэлэн нь 2010 онд амжилттай болж мэргэжлийн байгууллага, урлаг судлаач төдийгүй уран зураг сонирхогч гадаад, дотоодын олон үзэгчдээс өндөр үнэлэлт авч байсныг урлаг сонирхогч та бүхэн санаж буй биз ээ.
Тэгвэл “Мэдрэмж-2012” нэртэй бие даасан үзэсгэлэн нь Монголын Урчуудын Эвлэлийн үзэсгэлэнгийн танхимд маргааш нээгдэх гэж байна. Орчин цагийн уран зургийн хөгжил, өнгө төрхийг тодорхойлж яваа чадалтай зураачдын нэг Зураач С.Энх-Амгалангийн энэхүү бие даасан үзэсгэлэнд сүүлийн жилүүдэд туурвисан модерн чиглэлийн 80 гаруй томоохон хэмжээний тосон будгийн шинэ уран бүтээлүүд нь тавигдаж байгаагаараа онцлог юм. Тэрбээр өнгөрсөн оны 11 дүгээр сард дэлхийн соёл урлагийн төв болсон Францын Парис хотноо байрлах олон улсын соёл боловсролын байгууллага – ЮНЕСКО-гийн төв байранд япон, солонгос, монголын шилдэг зураачдын хамтарсан үзэсгэлэнд өөрийн биеэр амжилттай оролцож “Бороо” бүтээл нь европчуудын сонирхлыг маш ихээр татаж үзэгчдээс өндөр үнэлэлт авсан байна.
Үзэсгэлэн 01 сарын 25-ныг хүртэл гарах аж.
