Хамтлагийнхаа уран бүтээлийг завсарлаад “Харанга”-ын Х.Лхагвасүрэн, “Номин талст”-ын Т.Дэлгэрмөрөнтэй хамтарч “Мөнх хөх тэнгэр мину” цомгоо гаргаж, бүр тоглолт хийхээр товлосон С.Амармандах өдгөө тун ч завгүй яваа.
Харин түүний хамтрагч Б.Маадай студийнхээ ажилд анхаарч байгаа бөгөөд доргио залуус саяхан хуучны андаа дурсч, сонирхолтой түүхээ ярьжээ. “Донж” төвийн тэргүүн Б.Төгөлдөр агсантай анх хэрхэн танилцаж байсан, хамтлагийн стиль имижийг яаж өөрчилсөн зэргийг дурссан Б.Маадай “Үгүй ээ, мөн ч лут хүн байсан шүү. Үсээ шар өнгөөр будуулж, охид залуусын дунд моод дэлгэрүүлсэн минь ч түүнтэй холбоотой.
Тоглолтын тайзан дээр ч яая гэхэв. Гудамжинд явахаар хүн амьтан цочиж үргээд шар толгойг минь их л гайхдаг байлаа. Тэр үндэсний хувцас, цэргийн загвартай сүрлэг өмсгөлүүдийг хүртэл Төгөлдөр ах маань сэдэж хийсэн шүү дээ” гэж дурсамжтай явдлуудаа эргэн санагалзав. Үнэхээр ч тус хамтлагийн уран бүтээлээс гадна фэнүүдийг нь алмайруулах олон алхмыг хийхэд тусалсан хүн нь тэр байсан гэдэг.
Р.Есүй
