Өнгөрсөн дөрвөн сард Европын орнуудаар аялан тоглолтоо хийчихээд ирснээс хойш амралтын байдалтай байсан "Мотив"' хамтлагийн ахлагч Б.Эрдэнэбаяр буюу Жижгээгээс сүүлийн үеийн уран бүтээлийх нь сонин хачнаас сонирхлоо. Тус хамтлагийнхан шинэ цомгоо хэвлэлтэд явуулаад байгаа аж.
-Шинэ цомгоо хэвлэлтэд явуулсан гэсэн. Ямархуу цомог гарах гэж байна вэ?
-Европын орнуудаар аялан тоглолтоо хийж ирээд хэсэг амарч байгаад саяхнаас шинэ уран бүтээлийнхээ ажилд орсон. Одоогоор гурван ч дуугаа дүрсжүүлээд байна. Шинэ цомогт "Чи минь", "Өөрийгөө уучил" зэрэг 11 дуу багтаж байгаа. Ихэнх уран бүтээл маань цоо шинэ. Одоогоор цомгоо хэвлэлтэд явуулчихсан байна.
-Цомгийнхоо нэрийг өгсөн биз дээ?
-Шинэ цомгоо "Цасан бороо" гэж нэрлэсэн. Ирэх сард хэвлэлтээс ирэх байх. Энэ цомогт маш чанартай бүтээлүүд орж байгаа. Дуунууд маань янз бүрийн сэдэвтэй бөгөөд залууст зориулсан орчин үеийн хэмнэлтэй, тэднийг өөдрөг амьдралд уриалсан өнгө аястай. Мөн уянгын дуунууд ч багтаж байгаа.
-"Мотив"' хамтлаг энэ жил бие даасан тоглолт хийх үү?
-Манай хамтлаг өнгөрсөн жилүүдэд хоёр ч том тоглолт хийж, фэнүүддээ бэлэг барьсан. Харин энэ жил бие даасан том тоглолт хийх бодолгүй байгаа. Харин шинэ цомгийнхоо баярыг ирэх сарын эхээр хийнэ. Шинэ цомог маань хэвлэлтээс ирэхээр манай хамтлагийн дууг сонсдог фэнүүддээ зориулж, бяцхан тоглолт хийхээр төлөвлөж байна.
-Танай хамтлаг удахгүй Солонгос, АНУ-аар аялан тоглох сурагтай байсан. Энэ талаар?
– Шинэ цомгийнхоо баярыг хийчихээд л Солонгос, АНУ-аар аялан тоглолт хийх төлөвлөгөөтэй байгаа. Өнгөрсөн хавар бид Европын орнуудаар тоглоод ирсэн. Тэр тоглолтоос багагүй туршлага хуримтлуулсан гэхэд болно.
Тиймээс Солонгос, АНУ руу явж, тэнд ажиллаж, амьдарч байгаа монголчууддаа өөрсдийнхөө уран бүтээлийг хүргэхээр шийдсэн юм.
Ж.Отгонмягмар
