Урин дулаан зун цаг улирч, урлагийнхны сезон эхэллээ. Одоо тоглолтоо хийх нь хийж, шинэ CD-ээ олны хүртээл болгох нь ч болгох биз. Харин энэ намар Монголын рок, поп урлагт өөр, өөрсдийн орон зайг эзэгнэсэн хоёр хамтлаг 15 жилийн ойгоо нижгэр тэмдэглэнэ. Тэд бол “Sweetymotion”, “Номин талст” хамтлагийнхан юм. “Тоолбол нас чацуу, төөлбөл бие чацуу” гэдэгчлэн Монголын урлагт хүчин зүтгэсэн он жилүүдээрээ чацуурхсан тэд 15 жилийнхээ ойн үеэр хамтдаа дуулж, сюрприз барих гэнэ.
Нэгэн нууц задлахад, “Sweetymotion” хамтлагийнхан энэ үеэр бие даасан театрчилсан тоглолт хийхээр төлөвлөжээ. Харин энэхүү тоглолтоо хэрхэн нэрлэж, тоглолтын ямар өвөрмөц шийдлийг үзэгч олонд сонирхуулахаа одоогоор нууцалж байгаа юм. Хөгжмийн зохиолч Б.Чинбат болон “Sweetymotion” хамтлагийнхан Баянхонгор аймагт саяхан болсон Бага олимпод оролцож, Өвөрхангай, Өмнөговь аймгийн ойн арга хэмжээнд уригдаад тун завгүй явна.
Д.БИШРЭЛТ
