|
Саяхан “Мишээл экспо”- д болсон “Silence white” шоуг зохион байгуулсан “Монгол микс” продакшны хамт олон тэндээс сэтгэл дундуур гарсан залуусаас уучлалт гуйжээ. Энэ жил долоо дахь удаагаа болсон уг арга хэмжээ төсөөлж байгаагүй замбараагүй болсон аж. Үзэгч залуусын тав тух, сэтгэл ханамжийн талаар огтхон ч санаа тавиагүй нь цагаан хувцсаар цэмцийтэл гоёж очсон залуусын уур бухимдлыг баржээ. Дотор нь зай байхад хамгаалалтынхан оруулахгүй удааснаас хөнгөн нимгэн хувцасласан охид бүсгүйчүүд даарсан. Бээрсэн хүмүүс шаардлагын дагуу нэг эгнээ болж цувж орохоос тээршаасан, улмаар хоёр талын хооронд маргаан үүсч түргэн тусламж дуудахдаа хүрсэн гэх зэрэг шалтгаанаас болж шоудах өндөр сэтгэгдэлтэй байсан залуус сэтгэлээр унаж гэнэ. Бөөн уур уцаар болж арайхийж дотогш орсон залууст ханатлаа бүжиглэж цэнгэх сэтгэгдэл төрөхгүй байсаар удалгүй уван цуван шоуг орхин гарсаар байжээ. Энд тэндгүй “Хайран 20 мянган төгрөг. Ингэх байсан юм уу, гэртээ байж байдаг байж” гэх зэргийн гомдол. Шоучид энэ тухай бичиж, интернэтээр хоёр, гурван өдрийн турш гомдоллосонд зохион байгуулагчид санаа нь зовсон уу, уучлалт гуйжээ. Ингэхдээ өөрсдийнх нь буруу байгаагүй гэдгийг ойлгоорой гэсэн байх аж. Ж.Гэрэл |
