Энэ баасан гаригт анхны бие даасан тоглолтоо хийх гэж байгаа хөгжмийн зохиолч Г.Пүрэвдоржийг нэгэн өдөр тутмын сонинд Соёлын Гавьяат зүтгэлтэн гээд биччихжээ. “СГЗ биш ээ, СТА шүү дээ” хэмээн андуу бичсэн сэтгүүлчид нь хэлсэн чинь үнэмшдэггүй гэнэ. Төрсөн нутгийнхаа тухай бичсэн хэмээн өөрөө нэрлэсэн “Улаанбаатарын үдэш”-ээс өгсүүлээд “Нандин эрдэнэ”, “Мартъя”, “Зөвхөн тэр хайрандаа” гээд 30 жил уран бүтээл туурвиж байгаа түүнийг СТА-аас өөр сэтэргүй гэхээр гайхсан нь аргагүй байсан байх.
Гавьяагүй хэрнээ Гавьяаттай, гавьяа байгуулсан хэрнээ Гавьяагүй хүн бидний дунд олон байдаг. Тэдний нэг нь СТА Г.Пүрэвдорж. “Таныг шагнах гэсэн юм. Тодорхойлолтоо өгөөч” гэвэл “Өө хэрэггүй, хэрэггүй” гэж хэлж мэдэх хүн гэж ойр дотныхон нь ярих юм билээ. Ийм л нэг даруухан хэрнээ цалгисан их авьяастай хүн бидэнд анхны уран бүтээлийн тоглолтоо дэлгэхэд бэлэн болоод байна.
М.Жаргал
