Испанийн хамгийн том кино наадам болох Сан Себастианы кино наадмын зохион байгуулах хороо Холливудын жүжигчин Жон Траволтагийн кино урлагт оруулсан хувь нэмрийг нь үнэлэн хүндэтгэлийн шагнал олгожээ. Тус наадамд Траволтагийн тоглосон “Зэрлэгүүд” кино өрсөлдөж байна.
Сан Себастианы кино наадам Жон Траволтагаас гадна найруулагч Оливер Стоун, Шотландын жүжигчин Юан МакГрегор, Америкийн жүжигчин Томми Ли Жонс нарын кино урлагт оруулсан хувь нэмрийг нь үнэлж шагнал гардууллаа. 58 настай Траволтагийн тоглосон “Зэрлэгүүд” нэртэй кино тус наадамд өрсөлдөж байгаа юм.
Сан Себастианы кино наадам есдүгээр сарын 29 хүртэл үргэлжилнэ. Оливер Стоуны найруулсан гэмт хэргийн триллер төрөлд багтах уг кинонд Жон Траволта, Бенисио Дель Торо, Сальма Хайек нар тогложээ. Зохион байгуулах хороо Жон Траволтагийн гол дүрд нь тоглосон “Бямба гаригийн халуун орой” киног онцолсон. Бүжгийн кино гэдэг төрөлд багтдаг уг кинонд бүтээсэн дүрээрээ Траволта “Оскар”-ын шагналд нэр дэвшиж байжээ. Өмнө нь кино урлагт оруулсан хувь нэмрийг нь үнэлж олгодог Доностиа шагналыг Гленн Клоуз, Жулиа Робертс, Ричард Гир, Вүүди Аллен нар хүртэж байжээ. Энэ жил Сан Себастианы кино наадам 60 дахь жилдээ зохион байгуулагдаж байгаа ажээ.
Г.Ганбаяр
