Монголын яруу найраг утга зохиолын "ноён уул" Монгол Улсын Төрийн шагналт, Ардын уран зохиолч, “Болор цом” наадмын гурван удаагийн эзэн Б.Лхагвасүрэнгийн "Эжийтэйгээ байхад би баян байсан" "Боржигоны бор тал" зэрэг шүлгийг нь сурагч ахуй насандаа цээжлээгүй хүн үгүй байх.
Тэрээр аавынхаа тухай "Миний аав дөрвөлжин бурам шиг сайхан эр хүн байсан. Хүний аливаа дурьдатгал сэтгэл зүрх, оюун тархинаас эхэлдэг. Тиймээс ч би аавынхаа тухай дурьдатгалыг ясан доторхи чөмөгнөөсөө эхэлнэ гэж бодож байна. Миний аав олон таван үггүй эгэл хүн байсан. Над шиг чалчаа юм байгаагүй ээ. Би энэ чалчаа байдлаа цагаатгаж бодохдоо их саглагар модон дор суусан шувуу болгон жиргэж байдгийг санадаг юм. Тэгээд л би ийм чалчаа байдаг биз. Аав маань уран гоё үг унагаж, гуадаж ярьдаггүй, уурнаас хол, зөрүүдэд их ойр хүн байсан даа. Хадар хүдэр татсан түргэн хөдөлгөөнтэй, шазруун шударга нэгэн байлаа" хэмээн дурсчээ.
