2013 он гарснаар Циркийн амжилт дахин мөнгө, хүрэл гэсэн медалиар нэмэгдлээ. Италийн Ромд жил бүр зохиогддог 29 дахь “Golden circus festival” гэх алдартай тэмцээнд Монголын гурван нугараач хоёр төрлөөр оролцоод эх орондоо мөнгө, хүрэл медаль өвөртлөн ирлээ. Ингээд тус наадмаас хүрэл медаль хүртсэн СТА О.Цэцэглэнтэй уулзаж ярилцлаа.
-Аль чуулгын нугараач вэ?.Өөрийгөө танилцуулахгүй юу?
-Намайг Одгэрэл овогтой Цэцэглэн гэдэг. 23 настай. Үндэсний дуу бүжгийн эрдмийн чуулгад уран нугараачаар ажилладаг. Мөн “Мандах бүртгэл” дээд сургуулийн Нягтлан бодох бүртгэл, банкны дөрөвдүгээр ангийн оюутан.
-Хэдэн настайгаасаа нугарч эхлэв?
-Би найман настайгаасаа нугаралтаар хичээллэх болсон. Угаасаа цирк, нугаралт аль аль нь багаасаа хичээллэдэг.
-Хамгийн анх хэдэн настайдаа ямар тэмцээн уралдаанаас шагнал хүртэж байв?.
-Хамгийн анх 10 настайдаа Монгод “Цэцгэн шүүдэр” гээд нугаралтын тэмцээн болдог байсан. Тэр тэмцээнээс хүрэл медаль авч байсан. Дараа нь дахин нэг жил өнжиж ороод алтан медаль авч байлаа.
-Италид болсон “Golden circus festival” болох олон улсын циркийн наадамд Монголынхоо нэрийг гаргаад маш амжилттай оролцоод ирлээ. Тэмцээнийхээ талаар?
-Монголынхоо урлагийг тэр дундаа циркээ олон улсад сурталчилж, таниулахын тулд 2013 оны нэгдүгээр сарын 6-нд “Golden circus festival” гээд тэмцээнд оролцлоо. Энэхүү тэмцээнээс хүрэл цом хүртсэн. Тус тэмцээн 29 дахь удаагаа зохиогдож байгаа Европт их алдартай, нэлээн том, “А” зэрэглэлийн тэмцээн байгаа.
-Хэдэн орны тамирчид өрсөлдөв?
-13 орны 60 гаруй жүжигчид 30 үзүүлбэрээр өрсөлдсөн. Монгол Улс маань энэ тэмцээний “А” зэрэглэлд бүртгэгдээгүй байсан. Одоо бол бүртгэх байх гэж найдаж байна. Мэдээж улс бүрийн хамгийн шилдэг гэсэн циркийн жүжигчид очиж оролцдог учир маш өрсөлдөөнтэй болсон. Монголоос хоёр номер л бэлтгэгдэж явсан. Тэгвэл энэ хоёр номер хоёулаа медаль хүртээд ирнэ гэдэг үнэхээр сайшаалтай. Оросоос гэхэд л хоёр, гурван номер ирсэн. Бусад улсаас мөн л олон номерууд ирсэн. Гэхдээ тэр бүгдээс Монгол илүү байсан шүү.
-Хос уран нугаралтаар энэхүү шагналыг авсан гэсэн үү?
– Би Ганхуягийн Нямгэрэл гэдэг охинтой хоёр хос үзүүлбэрээр хүрэл цом хүртлээ.
-Энэ тэмцээн 2012 оны арванхоёр дугаар сарын 24-нөөс 2013 оны нэгдүгээр сарын 6 хүртэл үргэлжилсэн. Фествалийн хамгийн сүүлийн өдөр оноо нь гарч энэ шагналыг хүртсэн. Бидэнтэй хамт тэнцвэрийн эрэгтэй уран нугаралт үзүүлдэг Э.Лхагва-Очир гээд залуу явсан. Тэр залуу маань мөнгөн цом хүртсэн. Ингээд Монголоос хоёр номер явсан. Хоёулаа амжилттай оролцоод ирлээ. Мөн шинэ оны хамгийн эхний медаль гэдгээрээ онцлог байгаа. Тиймээс энэ жилдээ нэлээн олон медаль дуудах байх. Бидний хэлдгээр булган сүүлтэй байна байх гэж итгэж байна.
-Хосоороо тэмцээн уралдаанд орохдоо хосоо яаж сонгодог вэ?. Г.Нямгэрэл та хоёрын хувьд хэзээнээс хамтарч үзүүлбэр үзүүлдэг болов?.
-Г.Нямгэрэл бид хоёр дөрөв дэх жилдээ хамт ажиллаж байна. Хамгийн анх 2009 онд нэг баг болоод хамтарч ажилласан. Түүнээс хойш хамт нугардаг болсон. Г.Нямгэрэлийн хувьд цагдаагийн “Сүлд” чуулгын нугараач.
-Чиний хувьд өмнө нь мэдээж олон улсын тэмцээн уралдаануудад оролцож байсан байх?. Ямар, ямар шагнал хүртэж байв?
-Би 2010 онд дэлхийн хамгийн том Monte-Carlo тэмцээнд оролцсон. Энэ тэмцээн дэлхийн циркийн хамгийн том нь. Спортоор зүйрлүүлж ярьвал олимп, дэлхийн аварга гэсэн үг. Тэмцээн 2010 оны нэгдүгээр сард 34 дэх төрөл нь болсон. Үүнд Г.Нямгэрэл бид хоёр бусад охидын хамт есөн хосын үзүүлбэр үзүүлж хүрэл медаль авч байсан. Ингээд дахин энэ оныхоо аравдугаар сард Хятадын “Ухан” гээд дэлхийд нэлээн дээгүүрт тооцогддог тэмцээнд оролцоод хүрэл медаль авчирч байсан.
-Олон улсын тэмцээн уралдаанд оролцоход санхүүгийн асуудал тулгарах уу?. Эсвэл улсаас төсөвлөдөг үү?
-Ерөнхийдөө тухайн зохион байгуулж байгаа газраас байрлах зочид буудал, ирж, очих зардлыг даадаг. Зарим тохиолдолд өөрсдийгөө болгодог. Спонсор болон улсаас дэмжиж тусалсан зүйл байдаггүй.
-Мэдээж залуу эрч хүчтэй хүн. Цаашдаа маш том зорилго тавьсан байгаа байх?
-Дэлхий даяараа Monte-Carlo гэдэг тэмцээн бол циркчдийн хүсэл мөрөөдлийн тэмцээн байдаг. Тэр тэмцээнээс л алтыг авах зорилго, хүсэл мөрөөдөл байгаа. Удахгүй энэхүү тэмцээнд оролцохоор явах байх гэж найдаж байна. Мэдээж би монгол хүн. Монголоороо бахархадаг. Монголынхоо энэхүү агуу урлаг, өв соёлыг дэлхий даяар түгээж, эх орноор маань бахархаасай гэж хүсдэг.
Д.Ундрах
Таныг урлагийн тэнгэр ивээг
urlag.mn
