“Монгол кино нэгтгэл”-ийн захирал Ж.Солонго Монгол Улсын соёлын тэргүүний ажилтан цол тэмдгээр дөрвөн ахмадыг шагнасан. Гэтэл түүний олгосон СТА цолны үнэмлэх хуурамч байсан гэнэ гэсэн мэдээлэл хэвлэл мэдээллийн хэрэгслээр цацагдаад байгаа билээ. Энэ мэдээлэл хэр бодитой талаар яамны болон буруутгагдаад байгаа Ж.Солонгын байр суурийг сонирхлоо. Мөн хуурамч шагнал хүртсэн ахмадын ар гэрийнхэнтэй ч уулзсан юм.Энэ талаар Соёл, спорт, аялал жуулчлалын яамнаас тодруулахаар яамны мэргэжилтэн н.Эрдэнэчулуунтай уулзахад энэ асуудал манай яамтай огт холбоогүй. БШУЯ-наас асуу гэсэн юм. Тэгээд БШУЯ-ны шагнал хариуцсан мэргэжилтэн н.Наранзултай уулзахаар очиход тэрбээр эмнэлэгт хэвтсэн байсан учир утсаар холбогдлоо. Тэрбээр энэ хэрэг одоо цагдаад шалгагдаж байгаа. Шалгагдаж байгаа хэргийн талаар ярилцлага өгөх боломжгүй гэв. Тиймээс үнэмлэхийг хуурамчаар үйлдсэн гэж буруутгагдаад байгаа Монгол кино нэгтгэлийн захирал Ж.Солонготой уулзаж дараах хариултыг авлаа.
-Таныг СТА цол, тэмдгийг хуурамчаар үйлдэж тараасан гэх мэдээлэл гараад байна. Үүнд ямар тайлбар өгөх вэ?
-Соёлын тэргүүний ажилтан цолыг соёл урлагийн байгууллагад 15-20 жил ажилласан хүмүүст Засгийн газраас өгдөг юм. Бид өмнө нь олон хүнд СТА цол, тэмдэг өгсөн. Манай байгууллагаас 90 гаруй хүн энэ цол тэмдгээр шагнагдсан байдаг. Энэ яригдаад байгаа СТА цол, тэмдгийг “Жигжид” сангаас 4-5 ахмадад өгүүлэхээр өнгөрсөн долдугаар сард хүсэлт гаргаж бичиг баримтыг нь яам руу явуулсан.
Долдугаар сарын дундуур яамнаас яриад “Танай дөрвөн хүний СТА цол, тэмдэг гарсан” ирж аваарай гэж хэлсэн. Тэгээд манай лабораторийн эрхлэгч Ш.Ооёо яваад яамнаас энэ цолны үнэмлэхүүдийг авчирсан. Тэгэхдээ үнэмлэхүүдийг нь авчраад тэмдгийг нь авчраагүй юм. Тэгээд яагаад тэмдгийг нь авчраагүй юм бэ гэсэн чинь яаманд тэмдгийн нөөц дууссан байна, дараа нь аваарай гэж байна гээд ирсэн.
Тэгэхээр би шагнагдсан хүмүүстээ тэмдгийг нь ирэхээр нь хамтад нь өгье гэсэн чинь манай ажилчид цагаан сар болж байна, өгчихье. Баяраараа ах дүүдээ үзүүлж баярлаг гэхээр нь өгсөн. Цагаан сараар ахмадууддаа хүндэтгэл үзүүлэх үеэрээ энэ шагналыг дөрвөн ахмаддаа өгсөн.
-Энэ үнэмлэхийг хаанаас авсан юм бэ?
-БШУЯ-наас манай лабораторийн эрхлэгч Ооёо явж авчирсан. Энэ хүмүүсийг шагнах талаар Жигжид сангаас тодорхойлолтыг гаргаад өнгөрсөн оны зургадугаар сард Боловсролын яаманд өгсөн. Уг нь наадмаар тааруулаад шагналыг нь өгье гэж бодсон ч амжаагүй. Тэгээд сүүлд гарахаар нь хадгалж байгаад сая цагаан сараар гардуулсан юм. Түүнээс биш гудамжнаас юм уу, захаас энэ үнэмлэхүүдийг аваагүй. Яамнаас манай ажилтан очиж авсан. Тэгэхээр энэ үнэмлэхүүд төрийн яамнаас л гарсан байж таарна.
-Яагаад таныг буруутгаад байгаа юм бол?
-Би төрийн шагналыг хуурамчаар үйлдэнэ гэж байхгүй. Сайдын гарын үсэг, яамны тамгыг дуурайлгана гэж байхгүй шүү дээ. Үнэхээр энэ үнэмлэхүүд хуурамч бол хуурамч үнэмлэх гаргадаг бүлэг хүмүүс байна. СТА цол, тэмдэг бол миний өгдөг шагнал биш. Би яамны шагналыг дамжуулдаг хүн болохоос гаргадаггүй. Энэ хэргийг Цагдаагийн Ерөнхий газрын харъяа эрүүгийн гэмт хэрэгтэй тэмцэх газарт өгч шалгуулж байгаа. Төрийн яамны тамга, сайдын гарын үсгийг дуурайлган хийнэ гэдэг бол ноцтой гэмт хэрэг. Дахин хэлэхэд үүний цаана хуурамч үнэмлэх үйлддэг бүлэг хүмүүс байна.
Их л бухимдаж гомдсон доо
Энэ шагналаар шагнагдсан хүний ар гэрийн хүн Монгол кино нэгтгэлд ажилладаг байхтай тааралдаж сэтгэгдлийг нь сонссон юм. Тэрбээр Монгол кино нэгтгэлд 30 гаруй жил монтажчинаар ажиллаж байгаад эдүгээ гавъяаны амралтаа эдэлж суугаа С.Нэргүйн гэр бүлийн хүн юм. Т.Доржгомбо гуай ч мөн Монгол кино нэгтгэлд боловсруулалтын техникч буюу лаборантаар олон жил ажилласан МУСТА хүн.
Тэрбээр энэ тухай “манай гэр бүлийн хүн цагаан сараар төрийнхөө шагналаар шагнуулаад их баяртай байсан. Гэтэл шагнал авсны дараахан TV5 телевизээр үнэмлэх хуурамч гэж мэдээлсэн. Эхэлж сонсоод их цочирдсон. Монголынхоо уламжлалт баяраар шагнал авсандаа баярлаж үр хүүхэд, хамаатан садандаа үзүүлж байгаад гэнэт ийм мэдээ сонсох эвгүй л юм байна лээ.
Мөн энэ үед манай гэргийтэй хамт кино үйлдвэрт гэрэл сонгогчоор ажиллаж байсан Оюунчимэг бас СТА цолыг авсан. Тэр хүн ч энэ мэдээг сонсоод цочирдсон. Шагналаа дээдэлж бурхан дээрээ тавьж байсан чинь төрийн тамгатай үнэмлэх хуурамч гэхээр хэн ч гэсэн сэтгэл зүйгээр унана шүү дээ. Тэр хүн их бухимдаж гомдсон. Хуурамч үнэмлэх өгч, иргэдээ хуурдаг дарга нар байдаг юм уу л гээд байсан.
Үнэмлэх бол төрийн тамгатай, сайдын гарын үсэгтэй сайхан л үнэмлэх байна лээ. Хуурамч гэдгийг нь бид яаж мэдэх вэ” гэсэн хариултыг өглөө. Юутай ч энэ үнэмлэх үнэхээр хуурамч уу, үгүй юу гэдэг нь шалгагдаж байгаа юм байна. Харин төрийн яамныхан шалгагдаж байгаа хэрэг болохоор ямар нэгэн хариулт өгөхөөс татгалзаж байна.
Эх сурвалж: "Нийгмийн толь"
