Бүсгүй хүн болж төрснөө
Бусдын нүднээс би мэдэрдэг
Бужигнаж үймсэн олны нудэн дунд гишгэхдээ
Бүсгүй заяанд төрснөө ухаарч дандаа ойлгодог
Эрээ цээргүй нүднүүд биеийг тэмтчихэд
Элдвийн завхай үгс чихийг булахад
Эрх дархтан хүртэл адгуусын араншингаа гаргахад
Эмэгтэй хүн болж төрснөө ухаардаг
Хотын гудамжаар алхлах уедээ
Хор шингэсэн нүдэнд оногдох уедээ
Толинд харахдаа олж үзээгуй бүсгүй хун
Тодрон гарч биеэс минь цацрахыг мэдэрдэг
Атаач ааштай эмэгтэй ширэв татан өнгөрөөд
Араас минь хутга шиг харц шидэхэд мэдэрдэг
Ариун сэтгэлт хөвгүүний нүд нь дальдраад
Алиман хацар нь ягаарахад мэдэрдэг
Ичгүүргүй шалиг эрс нүдээ ирмэж
Эхнэрээ хуурахад бэлэн байхад мэдэрдэг
Илт тэнэг хүмүүс элдэвлэж
Эмэгтэй биеийг бузар гэхэд мэдэрдэг
Энэ биеэс минь эмэгтэй хун илрэхийг мэдэрдэг
Эрмүүн гэрэлт залуу нас цацрахыг мэдэрдэг
Зохиогчийг нь бас л мэдэхгүй юм
_____________________________
Тийм гэж тайлбарлах аргагүй сэрлийг
Төсөөлж хэлэмгүй гоо хөмсөг чинь өгдөг
Ширхэг үс бүр нь сэтгэлийг татах гэж ургасан
Ширтэж ханамгүй хөмсгийг шүлгэнд дүрсэлж хэлэмгvй
Өө оломгүй сайхан эрүү өөдөсхөн зүрхийг хайлуулна
Өв тэгш эрүүг чинь харахад усан нүдэндээ итгэмгүй
Өрөвдөлтэй болхи хүн төрөлхтнийг бүтээсэн
Өнөөх бойтог бурхан урласан гэдэгт бодомгүй
Янаг хүслийг сэрээгч цэвэр гоо уруулын
Ягаарах нь харагдахад л бүхнийг мартуулах увидастай
Ухааныг самууруулагч төгөлдөр уруулыг амтлаад
Үлдсэн амьдралаасаа өөр юуг ч амсахгүй байхад яадгийм бэ!
Дүрсэлж хэлэмгvй дөлгөөн нүдийг ширтээд
Дурлаж дуусамгүй чиний нууцад нэвтрэхсэн
Бурхны төгс бүтээл чиний харцанд живээд
Бодит хорвоогийн бүх биет баялгийг таягдахсан.
_____________________________
Дэлбээгээ дөнгөж нээгээд турьгүйхэн цөмцийх
Дэлхийн аашинд дасаж ядах, хэнзхэн цэнхэр яргуй нь бүсгүй та юм шүү
Цэцгийн дэлбээ, нарны цацраг, салхины үзүүрээс ертөнцийн аясыг мэдэрдэг
Цэгээн гэрлийн цагаан давалгаа нь бүсгүй та юм шүү
Халтай жаргалтай хүний орчлонгоос хорвоогийн өнгийг мэдэрдэг
Хайрлаад ч үл барам ховор эрдэнэ минь бүсгүй та юм шүү
Дундрашгүй хайрын дуртгалыг тээсэн он жилүүдийн мөнгөн хэлхээс
Дуусашгүй амьдралын авралын сахиус нь бүсгүй та юм шүү
Удмын хэлхээг залгах хүслийн чандмань эрдэнэ
Ургийн холбоог дархлах голомтонд гийсэн нар нь бүсгүй та юм шүү.
Сэтгэл зүрхээрээ надад онгодын сахиус илгээсэн
Бүсгүй минь та тэнгэрийн хүн
Бүсгүй минь чинь толинд харахдаа инээмсэглэж байгаарай
Бүдэрч унасан чулуугаа хараад ч инээж яваарай
Ертөнцийн юм бүхэн чиний л төлөө хөдөлж байдаг
Ерөөлгүй энэ чулуу ч гэсэн чамайг ухаажиг гэж зам хөндлөн хэвтэнэ.
Тэртээх зуунд дайчин эрс чиний төлөө бүлээн цусаа урсгаж
Тэмүүжин хаан чамайг амгалан байг гэж энэ улс гүрнэ байгуулж
Чиний үзэсгэлэн гуаг тунхаглаж олон зураачид бүтээлээ мөнхөлж
Чамайг уяраах гэж олон найрагчид шүлгээрээ уралддаг
Эрхэс нараа тойрон эргэх тэнхлэг нь чи билээ
Эрдэмтэн мэргэд чамайг жаргаах гэж сургаал номоо хайрладаг билээ
Энэ цэлмэг хөх тэнгэрт минь алгасалгүй
Нар сар хүртэл чиний л төлөө ээлжилж хөөрдөг билээ.
Дуулсан дуунд нь уяраг гэж эгшигт айзам ийм уянгалаг байдаг
Дурлал хайраараа жаргаах гэж эр хүн ийм ухаантай байдаг
Дуурсах нэрээ өөрөө олоорой гээд
Дуудах нэр чинь ийм утгатай байдаг
Будант энэ орчлонд чамайг
Бусдыг өөрөөсөө илүү хайрлаж сураарай гэж
Бурхад чамайг эмэгтэй хүн эх хүн болгосон билээ
Бүсгүй минь чи
Өглөө сэрээд инээмсэглэж байгаарай
Өнөөдөр, хоёр маргаашаас үнэтэй шүү.
www.URLAG.mn
