Зураач Д. Булгантуяагийн "Нээлттэй урлан" бие даасан уран бүтээлийн үзэсгэлэн өнөөөдөр буюу энэ сарын 17-нд 16.00 цагт “Цагаандариум” галерей дээр нээлтээ хийх гэж байна.
Зураач, багш Д.Булгантуяа гэхээр дүрслэх урлаг сонирхогчдын нүдэнд абстракт чиглэлээр бүтээсэн уран бүтээлүүд нь буудаг. Энэ бол түүний нэрийн хуудас. Түүний зургуудаас хязгааргүй эрх чөлөө, орон зай, хүсэл тэмүүлэл мэдрэгддэг. Хэтэрхий тод биш, хоорондоо ууссан завсрын өнгө бүхий, сонирхол төрүүлэм хачин этгээд хийсвэр сэтгэлгээний зургууд нь харц булаана. Түүний бүтээлүүдээс дөрвөлжин цонхтой байшин гэх мэт энгийн зүйлийг хүлээх хэрэггүй. Тэр гурвалжин цонх, орог саарал хавар гээд өөрийн хачирхалтай ертөнцөө өнгө сүлэн буулгана.
Амьдралынхаа хором бүрийг уран зургийн ертөнцтэй холбосон тэрээр заяаны ханиа энэ л урлагаас олжээ. Түүний нөхөр мөн л зураач, бас хамтдаа МУБИС-ийн Дүрслэх урлагийн сургуульд багшилдаг. Уран зургийн гайхамшгийг шавь нартаа мэдрүүлж, ирээдүйн уран бүтээлч бэлтгэх их үйлсэд хүчин зүтгэж хосууд юм. “Адилхан уран бүтээлч болохоор ойлголцоход амар байдаг” гэж “ижилсдэг” эгэл жирийн бүхнийг эгэлгүй ертөнцөөр дэлгэн гаргадаг хоёр уран бүтээлч бие биенээ олж харсан нь ч тохиолдол биш гэлтэй.
www.URLAG.mn
