Цомог, шинэ санаа, шинэ уран бүтээлээрээ шинэ түүх эхлүүлж буй “Татар” хамтлагийнхан энэ жил 10 нас хүрч уран бүтээлээрээ дамжуулан нийгмийн сайн сайхны төлөө дуу хоолойгоо өргөхөөр нэгдэж, “Нөлөөллөөс дээгүүрт” хэмээх аян өрнүүлэхээр шийджээ.
Тэд ойн баяртаа зориулж, “Нөлөөллөөс дээгүүрт” цомог гаргасан бөгөөд цомгийн баяраа хийж, фенүүдтэйгээ уулзахаас гадна нийгэмд чиглэсэн олон ажил хийхээр зорьсон гэнэ. Тиймдээ ч цомгийнхоо нэрээр нэрлэсэн аяныг архины эсрэг уриан дор бүтэн хоёр сарын хугацаанд хэрэгжүүлэхээр төлөвлөжээ. Нийгэмд зөв хэвшил, хэрэглээ бий болгохоор зориглосон тэд цомгоо ердөө 1000 төгрөгөөр борлуулж, орлогыг 100 хувь архины эсрэг байгууллагын үйл ажиллагаанд зориулах юм гэсэн.
“Нөлөөллөөс дээгүүрт” цомгийн баяраа зургадугаар сарын 5-наас эхлэн хоёр сарын хугацаанд үргэлжлүүлж, "Татар"-чууд нийслэлийн өнцөг булан бүрт очиж, 60 удаагийн тоглолт хийх гэнэ. Тэдний нийслэл дэх "Аялан тоглолт" дүүргүүдийн задгай талбайд үнэ төлбөргүй болохыг сануулъя. Тоглолтын хүрээнд хандивын данс аялуулж, цугласан мөнгийг архины эсрэг байгууллагуудад хандивлахаа хамтлагийн залуус өнөөдөр мэдэгдлээ. “Татар” хамтлагийн 10 жилийн ойдоо барьж буй бэлэг болох уг аян зөвхөн нийслэл хотод өрнөөд зогсохгүй ирэх намраас орон нутагт үргэлжилнэ.
Нийгмийн хариуцлагаа ухамсарлан, бусдын төлөө зорилго нэгдсэн "Татар"-ын залуустаа амжилт хүсье. Тэдэнтэй нэгдэж, “Нөлөөллөөс дээгүүрт” амьдарцгаая.
www.URLAG.mn
