Х.Батболд : Бурхан таньд учирлах нь ээ

Зорчдоггүй зогсдог зам дээр
Залуу насаа барах нь ээ
Жаргадаггүй зовдог хорвоо дээр
Цөөхөн насаа үдэх нь ээ

   Хүсээд ч олддоггүй мөнгөнд зүтгэж
   Хайран бүхнээ алдах нь ээ
   Хүчлээд ч өндийхгүй амьдралд нухлагдаж
   Хүний ёсноос гажих нь ээ

Ямбанд багтахгүй ямааны мах сайн гэхээр идсээр
Янтаж сэрүүдэж өвдөх нь ээ
Буцалсан ус сайн гэхээр уусаар
Бие сульдаж тамирдах нь ээ

   Сайн сайхныг ерөөж хар ус сэржимдсээр
   Шартаж хордож талийх нь ээ
   Сайхан амласан болгонд итгэж сонголт хийсээр
   Шатаж түлэгдэж жилийх нь ээ

Хүнээс дутуугүй амьдрах гэж мэрийсээр
Хөлд нь чирэгдэж унах нь ээ
Хүнээс илүү ажиллахгүй гэж гүрийсээр
Хөл чилж нугарах нь ээ

    Номын дуунд хууртсаар байгаад
    Ноён нуруу хугарах нь ээ
    Ноёдын үгэнд хуурагдсаар байгаад
    Ноогдсон амьдрал хөглөрөх нь ээ

Хардаг хардаггүй шашинд итгэж
Хичээж олсон хэдэн цаасаа үрэх нь ээ
Ханадаггүй цаддаггүй чөтгөрт цэрвэж
Мэрийж олсон хүмүүн төрлөө золих нь ээ

    Будилж төөрч эргэлзсээр яваад
    Бухимдаж бачуурч дэлбэрэх нь ээ
    Бусармаг бүхэн өөдлөөд байхаар
    Битүүхэн атаархаж үхэх нь ээ

Буруу зөвөө олохгүй явсаар
Бурханы оронд заларах нь ээ
Бузар бүхэнийг үйлдсээр яваад
Бирд тамыг зорих нь ээ

    Бурхан чи байдаг юм бол
    Буруу зөвийг ялгаж өгөөч
    Буян заяа чи байдаг юм бол
    Бузгай сайн амьдаруулж өгөөч

Эрлэг там чи байдаг юм бол
Эргүүтсэн биднийг өршөөгөөч
Энгүй их ачтан байвал
Эгэл биднийг өндийлгөөч ээ     

www.URLAG.mn