УДЭТ-ын жүжигчин Г.Эрдэнэбилэгийг авъяаслаг, эрч хүчтэй, үнэ цэнэтэй жүжигчин хэмээн үнэлдэг. Тэрбээр СУИС-ийн кино драмын ангийг төгссөн бөгөөд эзэмшсэн мэргэжилдээ сэтгэл хангалуун ажилладаг нэгэн.
Түүний хөдөлмөрч дайчин зан бзтээсэн дүрээс нь ч эрхгүй мэдрэгддэг. Алив магтаалд бялуурч, шүүмжлэлд гоморхоод байдаггүй аль ч цагт өөрийн чадвараа дайчлан ажилладаг жүжигчин хэмээн үзэгчид үнэлдэг.
Тэрбээр тайз дэлгэцийн чамгүй олон дүрийн эзэн болж, олноо танигдсан төдийгүй “Гэгээн муза-2011” наадмын шилдэг эрэгтэй дүрийн эзэн болж байсан билээ. Кино уран бүтээлийн хувьд “Би чамд хайртай-2”, “Татар ажиллагаа”, “Бурхан өршөөг”, “Ганган Төгс , “Аравт” кинонд дүрээ амжилттай бүтээсэн.
Түүнийг сайн жүжигчин гэдгийг нь мэдэх ч сайн зураач гэдгийг нь тэр бүр хүмүүс мэдэхгүй бизээ. Тэрбээр анх Дүрслэх Урлагийн Дээд сургуульд элсэж зураач болохоор бэлдэж байсан ч гэнэтийн шийдвэрээр СУИС-д шалгалт өгч жүжигчин болсон түүхтэй гэнэ. Ямартай ч зураач болохоор бэлдэж байсан болохоор зургийн мэдрэмжтэй, ур чадвартай бизээ.
Б.Хорлоо
