“Anemone” хамтлаг анх таван гишүүнтэй байгуулагдаж байсан билээ.Тэгвэл саяхан тус хамтлагийн гишүүн Жулдыз буюу Жулиа хамтлагаасаа гарчээ.
Тэрээр өөрийн хүсэл сонирхлоор Солонгос улсад суралцахаар явж байгаа учир хамтлагаасаа гарахаар болсон аж. Өмнө нь хамтлагаасаа хамгийн чадварлаг хоолойтой гэгддэг байсан Ооноо хамтлагаасаа гарч Япон руу суралцахаар явсан юм. Ингээд “Anemone” хамтлаг одоо гурван гишүүнтэй боллоо.
“Anemone” хамтлагт дуулахаасаа өмнө хэд хэдэн дуучны клипийг хөөрхөн төрхөөрөө чимээд амжсан Жулдыз буюу Жулиа багаасаа дуулж, бүжиглэдэг байсан, тус хамтлагийн ахлагч боловч үзэсгэлэнтэй төрхөөрөө эрчүүдийн нүдийг хужирлахаас өөр үүрэг роль бараг гүйцэтгэдэггүй гэгдэж байсан. Юутай ч аварга А.Сүхбаттай нэр холбогдсоныхоо дараахан “Сүхбат гэж хэн юм. Би тэр хүнийг чинь огт танихгүй” хэмээн мэдэн будилж, мэдлэгийнхээ хүрээг олонд таниулаад авсан билээ.
Жулиаг хамтлагаасаа гарах болсон шалтгааныг тэд ихэд нууцалж байгаа боловч ойрын эх сурвалжийн мэдээлснээр тус хамтлагийн гишүүн Цэнгэлэнтэй таарамж муутай байснаас болсон гэнэ. “Бид үхэн үхтэлээ энэ бүрэлдэхүүнээрээ байна” хэмээн амлаж байсан тус хамтлаг ийнхүү хоёр дахь гишүүнээ үдлээ.
Дашрамд дуулгахад “Anemone” хамтлаг шинэ жилийн шинэ дуугаа удахгүй гаргах гэж байгаа гэсэн шүү.
www.URLAG.mn
