Уран бүтээлч Д.Дорждэрэм бие даасан найм дахь үзэсгэлэнгээ “Бүрэн бусын онол” нэрээр толилуулах гэж байна.
Уран бүтээлч Д.Дорждэрэм нь Үйлдвэр урлалын коллеж болон Дүрслэх урлагийн дээд сургуульд боловсрол эзэмшин, мэргэжлийн уран бүтээлчийн гараагаа эхлүүлжээ. Түүний бүтээлүүдээс Монголын уран зургийн галерейн сан хөмрөг, Япон Улсын Фүкүока хотын Азийн урлагийн музей болон бусад гадна дотнын олон цуглуулагчдад хадгалагддаг бөгөөд 2008 онд Сингапурын урлагийн музейгээс зохион байгуулсан Oнцлох бүтээлийн уралдаанд түүний “Орон зай дахь дуу хоолой” бүтээл нь олон нийтийн санал хураалтаар
тэргүүлж, “People’s choice award” шагнал хүртсэн бол 2024 онд “Орон зайд” бүтээл нь Монгол Улсдаа оны шилдэг бүтээлээр нэрлэгдэж, Монголын уран зургийн галерейн сан хөмрөгт түүний бүтээлээс ахин нэг нь хадгалагдах болсон юм.
Түүний “Бүрэн бусын онол” үзэсгэлэн нь Д.Дорждэрэм уран бүтээлчийн замнал, үзэл санаа болон өмнөх бие даасан үзэсгэлэнгүүд, агуулгын цоо шинэ үргэлжлэл бөгөөд түүний өгөгдөл, зүй тогтлыг шүтэн, ухамсартай ухамсаргүйн заагт орших оюун ухаан, хүн төрөлхтний онцлогийг орчин үеийн баримал, зураг, абстракт илэрхийлэл, холимог техник зэрэг олон төрлөөр илэрхийлсэн хэв маягтай байх аж. Тус үзэсгэлэнгийн нэр “Бүрэн бусын онол”-ын хувьд, 20 дугаар зууны Австрийн суут математикч Курт Гёделийн “Бүрэн бусын теоремууд”-аас санаа авсан бөгөөд, онол хэмээн нэрлэсэн нь угтаа бол батлах боломжгүй үнэний тухай
өгүүлэх тус хоёрлосон теорем нь Д.Дорждэрэм уран бүтээлчийн бүтээл, үзэл санаа, батлах гэж оролдох шаардлагагүй болсон сэтгэгдлүүдтэй нь нэгэн буулгалтад орших боломжтойг олж харан, санал дэвшүүлснээр эхэлсэн бөгөөд үргэлжилж байгаа юм.
“Бүрэн бусын онол” үзэсгэлэн тавдугаар сарын 17-30-ны өдрүүдэд Монголын уран зургийн галерейд үргэлжилнэ.
