Монголын байгалийн гэрэл зурагчдын нийгэмлэгээс Монгол Улсын Ерөнхийлөгчийн ивээл дор зохион байгуулсан “Монголын байгалийн шилдэг гэрэл зураг-2025” олон улсын уралдааны шүүгчдийн дүн гарлаа.
Энэ жил нийт 726 бүтээл өрсөлдөж, дэлхийн хэмжээний найман шүүгч ажиллан шилдгүүдийг тодруулжээ.
Уралдааны шилдгийн шилдэг зургаар Э.Мөнхчулууны “Тайгын үр сад” бүтээл шалгарлаа.
Тус уралдаанд оролцогчид үзэсгэлэнт байгаль, зэрлэг амьтан, ахуй, агаарын гэрэл зураг гэсэн төрлөөр бүтээлээ ирүүлжээ.
Үүнээс “Үзэсгэлэнт байгаль төрөлд нэгдүгээр байрт Б.Эрдэнэбулганы “Байгальтайгаа зохицон амьдрагчид”, хоёрдугаар байрт Б.Эрдэнэбулганы “Диваажинд амьдрахуй дор”, гуравдугаар байрт Швейцарийн зурагчин Эрик Вон Шултессийн “Тэнгэрийн заадас доор хүрхрээ” зураг шалгарлаа.
“Ахуй” төрөлд нэгдүгээр байрт Э.Буянзаяагийн “Хайрын Мадригал” хоёрдугаар байрт Б.Эрдэнэбулганы “Бүргэдийн анчид”, гуравдугаар байрт М.Ганзоригийн “Өглөө” зураг тодров.
“Зэрлэг амьтан” төрөлд нэгдүгээр байрт Г.Батсүхийн “Ой дахь чимээ”, хоёрдугаар байрт Э.Мөнхбаярын “Шунал”, гуравдугаар байрт Б.Баатарсүрэнгийн “Говийн зэрлэг адуу” зураг тодорчээ.
“Агаарын” гэрэл зургийн төрөлд нэгдүгээр байрт Г.Батсүхийн “Нарны туяанд гялалзах тэмээн сүрэг”, хоёрдугаар байрт Б.Эрдэнэбулганы “Байгалийн хээ”, гуравдугаар байрт Ж.Амартүвшиний “Ойн гүн дэх модон байшин” зураг шалгарлаа.
Уралдааны тусгай байрын шагналыг Ц.Алтангэрэл “Тогорууны сүүдэр” зургаараа хүртжээ.
Уралдааны шилдэг гэрэл зургийн үзэсгэлэнг энэ сарын 20-нд “Blue Mon Tower” дахь “Norphei Art Gallery”-д нээх юм.
