МУЭ-ийн гишүүн, уран бүтээлч Л.Оргилболдын “Nature’s Charisma” бие даасан үзэсгэлэн Урчуудын эвлэлийн үзэсгэлэнгийн танхимд гарч байна.
Тэрбээр, сүүлийн гурван жилийн хугацаанд монгол орны байгалийн үзэсгэлэнт газруудаар явж пастель тосон будгаар туурвисан 90 гаруй бүтээлээ тус үзэсгэлэнд дэлгэжээ. Пастель тосон будгийн төрлөөр дагнан бүтээснээрээ нэн онцлог энэхүү үзэсгэлэнгээс байгалийн ер бусын татах хүч, өнгөний нэгдэл, дахин давтагдашгүй хэмнэлийг мэдрэх боломжтой аж.
Пастель тосон будгийн төрөл нь цөөн өнгөөр хөнгөн, хүнд өнгийг аажим шилжүүлж зурдаг онцлогтой бөгөөд Монголд энэ төрлөөр туурвидаг цөөн уран бүтээлч бий.
Л.Оргилболд МУБИС-ийг дүрслэх урлаг, дизайны багш мэргэжлээр 2006 онд төгссөн. Түүнээс хойш өнөөг хүртэл чөлөөт уран бүтээлээ туурвиж байна. Энэ хугацаанд өөрийн бие даасан үзэсгэлэнг 10 удаа олон нийтэд дэлгэж байсны дийлэнх нь пастель тосон будгийн төрөл байв. Мөн тэрбээр 2018 онд “Алтан нутаг арт галерей”-г Төв аймгийн Заамар суманд байгуулж Монголын анхны уран зургийн галерейтай сум болгож байжээ.
Тус үзэсгэлэн энэ сарын 17-ныг дуустал олны хүртээл болно.
