Монголын рок хөгжмийн амьд домог “Харанга” хамтлагийн ойн баяр саяхан тохиосон. Үүгээрээ тэд өнгөрсөн сард тоглолтоо хийж, тоглолтын үеэр 2000 онд гаргаж байсан “Бодлын тэнгис” цомгоо дуудлага худалдаагаар зарж, нэлээд үнэд хүрсэн сурагтай.
Цомгийг нь нэгэн залуу 5,5 саяар худалдаж авсан бөгөөд энэ нь Монголдоо анхдагч хамгийн үнэтэй цомгоор шалгараад буй аж. Харин Харангийнхан уг мөнгөө сайн үйлсэд зориулна гэж амлаад байсан бөгөөд тэр ёсоороо Нярайн эмгэг судлалын тасагт эмгэгтэй, дутуу төрсөн нярай хүүхдийн хяналтыг сайжрууах төхөөрөмж авч бэлэглэжээ. Харин хэзээний хийдгээ хийчихсэн рок мангасууд цаашдаа ч хүмүүнлэгийн ажлаа зогсоохгүй хийсээр байх болно гэдгээ ч хэлжээ. “Хаана хүмүүнлэгийн үйл ажиллагаа хийж байна, тэнд бид фенүүдтэйгээ хамт оролцдог. Бидний сайн үйлс цаашид үргэлжлэх болно. Нэгдэх хүсэлтэй хүн бүрт хаалга нээлттэй” хэмээн залуучуудыг уриалсан байна.
Г. Ууганчимэг
