Сүхбаатар аймгийн Баруун-Урт сумын ерөнхий боловсролын дөрөвдүгээр сургуулийн 12 дугаар ангийн сурагч И.Эгшиглэн үндэсний монгол бичгийн уран бичлэгийн 60 гаруй бүтээлээрээ анхны бие даасан үзэсгэлэнгээ гаргалаа.
Тэрбээр хулсан үзэг болон бийрээр бичсэн бүтээлүүдээ үзэсгэлэндээ дэлгэжээ.
Тэрбээр есдүгээр ангиасаа үндэсний монгол бичгээр хичээллэж эхэлсэн бөгөөд түүнийг монгол бичигт татагдахад хамгийн их нөлөөлөсөн хүн бол аав нь. Аавынхаа монгол бичиг бичиж байгааг харах бүрдээ уран бичлэгийн төрлүүдийг илүү ихээр сонирхон судалж, улмаар аавтайгаа хамт хичээллэж эхэлсэн байна. Ингээд аавтайгаа хамтран бүтээл ч туурвидаг болжээ. Түүний үзэсгэлэнгийн бүтээлүүдийн хамгийн гол зөвлөх, туслах нь ч түүний аав.
Аав нь А.Идэрзаяа нь хэдийгээр дуучин мэргэжилтэй ч өөрийн хүсэл сонирхлоороо монгол бичгийн уран бичлэгийн төрлүүдээр хичээллэж, улмаар сургалтын төвтэй ч болжээ. И.Эгшиглэн хичээлийнхээ хажуугаар аавынхаа сургалтын төвд болон гэртээ тогтмол давтаж, бичлэгийн арга барилаа сайжруулдаг байна.
Түүний уран бичлэгийн үзэсгэлэнг гаргахад аав нь зөвлөж, бүтээл бүр дээр нь хамтран ажиллажээ.
“Монгол бичиг бол яг л бясалгал шиг. Би бичиж байхдаа хамгийн их тайвшралыг мэдэрч, анхаарлаа бүрэн төвлөрүүлж чаддаг. Тиймээс ирээдүйд ямар ажил, мэргэжилтэй болохоос үл хамааран монгол бичгээрээ бичиж, уншсаар байна. Мөн цаашид өөрийгөө хөгжүүлж, чадвараа улам сайжруулахыг хүсдэг” хэмээн тэрбээр ярив.
