Америкийн хамгийн эртний, хамгийн найдвартай толь бичиг “Merriam-Webster” 1400 шинэ үг, хэллэгийг толь бичигтээ нэмжээ. Шинээр орсон үгсийн дунд сүүлийн жилүүдэд залуусын хамгийн их ашиглагдаг “glow-up”, “looksmaxxing”, “meme coin”, “trash panda” зэрэг үгс багтсан байна. Тухайлбал, “trash panda” нь элбэнхийг өхөөрдөн нэрлэдэг хэллэг юм.
“Merriam-Webster”-ийн мэдээлснээр шинэ үгс нь хүмүүсийн өдөр тутмын амьдралд өргөн хэрэглэгдэж, тодорхой хугацаанд тогтсон хэрэглээтэй болсон үг, хэллэгүүд аж. Тиймээс эдгээр нь өнөөгийн нийгэм, соёлын өөрчлөлтийг харуулж байна гэжээ.
Шинэ үгсийн зарим нь хоол хүнстэй холбоотой. Тухайлбал:
- Superfood – шим тэжээл, амин дэмээр баялаг хүнс
- Bao – Азийн орнуудад түгээмэл, дотор нь шанз хийсэн зөөлөн талх
- Cake pop – бялуу болон кремийг хольж, савхан дээр байрлуулсан амттан
Мөн “cuffing season” гэсэн хэллэгийг толь бичигт нэмсэн байна. Энэ нь хүйтэн улиралд ганц бие хүмүүс хайр дурлалын харилцаа үүсгэж, хамтрагчтай болохыг эрмэлздэг үеийг хэлдэг.
Олон хүнд аль хэдийн танил болсон “whack-a-mole” хэллэг ч шинээр бүртгэгджээ. Энэ нь нэг асуудлыг шийдмэгц үүнтэй төстэй өөр асуудал гарч ирэх нөхцөл байдлыг илэрхийлдэг.
Харин “Mandela effect” гэх нэр томьёо нь нэг зүйлийг бодитоор болсон мэтээр олон хүн буруу санах үзэгдлийг хэлдэг. Түүнчлэн АНУ-д түгээмэл хэрэглэгддэг “California sober” гэх хэллэгийг мөн толь бичигт оруулжээ. Энэ нь кокаин, метамфетамин зэрэг бусад төрлийн мансууруулах бодис хэрэглэхээс татгалздаг ч марихуан эсвэл согтууруулах ундаа хэрэглэхийг хэлдэг байна.
Бусад сонирхолтой үгсийг дурдвал:
- Rickroll – хэн нэгнийг дуучин Рик Эстлигийн “Never Gonna Give You Up” дууг сонсгож, дохуурхах
- Uncanny valley – хиймэл зүйлийг хараад бодит юм шиг санагдах эвгүй мэдрэмж
- parasocial – зөвхөн өөрт л мэдрэгдэх сэтгэлзүйн холбоо
- vibe coding – хиймэл оюун ухаан ашиглан компьютерийн код бичих
- chili crisp – шарсан чинжүү, сармис эсвэл сонгины үйрмэгээр хийсэн, халуун ногоотой, шаржигнууран амтлагч
- yacht rock – 1970-аад оноос эхлэлтэй зөөлөн рок хөгжмийн төрөл
- neckbeard – эрүү, хүзүүг халхалсан сахалыг хэлнэ. Гэхдээ энэ нь эмэгтэйчүүдийг үзэн ядах үзэлтэй эсвэл компьютерт хэт автсан этгээд гэх мэт сөрөг утгаар хэрэглэгдэж болно.
- shapewear – биеийн порпорцыг зөв, тэгш харагдуулах зориулалттай бие барьсан хувцас
- Sunday scaries – амралтын өдөр дуусч, ажлын өдөр эхлэх гэж байгаа гунигтай, түгшүүртэй мэдрэмж
- crashout – хүнд ялагдал, гарз хохирол, сэтгэлээр хүнд унах зэрэг.
“Merriam-Webster” мөн тун удахгүй энэ жилийн онцлох үгийг зарлах төлөвтэй байна. Өнгөрсөн оны онцлох үг нь “Slop” байсан бөгөөд энэ нь хиймэл оюун ухаан ашиглан их хэмжээний, чанар муутай дижитал контентыг илэрхийлдэг байна.
