БНХАУ-ын ӨМӨЗО-ы Ордос хотод болж буй “Дэлхийн мисс-2012”-т эх орноо төлөөлөн оролцож буй Х.Баярмаагийн дуулиан намжихгүй нь.
Тэрбээр Топ моделийн шалгаруулалтад шилдэг 47-д багтсан ч, эцсийн шатанд үлдэж чадаагүй. Гэлээ ч “Авьяаслаг мисс” шалгаруулалтын финальд үлдээд байгаа.
Тэгвэл саяхан болсон “Шилдэг үндэсний хувцас” шалгаруулалтад Х.Баярмаагийн өмссөн монгол үндэсний хувцсыг “worldmiss.com” цахим хуудаст тусгайлан онцолж бичжээ. Зөвхөн түүний зургийг л тодруулж үзүүлсэн байх юм.
“Монголын оролцогчийн хувцас гарцаагүй онцгой байлаа. Үндэснийхээ онцлогийг илтгэсэн богино хар даашинз, тод улаан өнгийн нөмрөг, газар шүргэсэн хормой гэхчилэн бүгд сайхан зохицжээ.
Ялангуяа малгай нь бүр ч сүрлэг харагдуулж байна” хэмээжээ. Хэрэв Х.Баярмаа Шилдэг үндэсний хувцастай оролцогчоор шалгарвал автоматаар шилдэг 15-д үлдэх юм.
Г.Хүслэн.
