Энэ жилийн улсын баяр наадмын түрүү бөхөд Японы “Тоёото” корпораци автомашин олгохоор болсон тухай Баяр наадмыг зохион байгуулах хорооноос мэдээллээ.
Тэд түрүү бөхийн шагнал болох автомашиныг ирэх долоодугаар сарын 13-нд Уяачдын наадмаар эсвэл “Дээлтэй монгол” арга хэмжээний үеэр гардуулах юм байна. Учир нь долоодугаар сарын 12-нд түрүүлсэн бөх төрийнхөө шагналыг гардан авдаг бөгөөд тэрхүү шагналтай давхцуулахгүй байхаар төлөвлөжээ.
“Их хүрээ” уран бүтээлийн нэгдэл ирэх намар “Андууд” уран сайхны киноны ажилдаа орох гэнэ. Уг кинонд Монгол, Тува, Казахстан, Халимаг, БНХАУ-ын Уйгар орны уран бүтээлчид хамтран ажиллах юм байна. 7-р сарын 10-аас 15-ны хооронд дөрвөн улсын уран бүтээлчид манай улсад ирж кино зохиолын талаар санал бодлоо хуваалцах гэнэ.
Дахин нэг монгол кино олон улсын кино наадмаас “Гран-при” шагнал хүртжээ. Австри Улсад жил бүр зохион байгуулагддаг олон улсын кино наадамд 240 гаруй богино хэмжээний кино өрсөлдсөнөөс “Шторк” фильмийн залуусын бүтээсэн “Амирлангуй” хэмээх бүтээл тэргүүн байр эзэлсэн байна.
Зураглаач Д.Ангараг өнгөрсөн гуравдугаар сард болсон 86 дахь удаагийн “Academy awards” наадмын бүх арга хэмжээнд оролцсон бөгөөд Холливүдын нэгэн кинонд продюсер, зургийн найруулагчаар ажиллахаар болжээ.
Багаасаа л “од” болж энд тэндхийн хүүхдийн дууны тэмцээн уралдааныг алгасдаггүй байсан Т.Аминаа хүсэл мөрөөдөлдөө үнэнч болохоо харуулан, дуучин мэргэжлийг эзмшээд, чамгүй амжилттай явж байгаа билээ.
Улаанбаатар хотын Захирагчийн ажлын алба, Азийн сан, “Эх орон” телевиз хамтран хотын соёлд иргэдийг уриалах, сэтгэхүйг өөрчлөх зорилгоор “Цэвэр хот” төсөл хэрэгжүүлэхээр боллоо. Энэ төслийн хүрээнд хотын гудамж талбай, зам дагуу “Муу зуршлыг маргааш биш өнөөдөр хязгаарлахад амархан”, “Та шүлсээ битгий хая, таны хүүхэд тоглоно”, “Үүнийг цэвэрлэхэд амархан…, сэтгэхүйг нь л өөрчилмөөр гэсэн сануулга бүхий самбарууд байрлуулах гэж байна.
Пянз түүх өгүүлдэг. Ингээд бодохоор одоо цагт пянз музейд байх ёстой зүйл юм шиг санагддаг. Гэхдээ тийм биш бололтой. Учир нь хамгийн чанартай хөгжмийн дугаралт ыг пянзны л гадаргуу дээр буулган насан туршдаа сонсож хэдэн үе дамжуулан хадгалж болдгоороо давуу тал ихтэй гэнэ.
Тийм учраас гадны том хамтлагууд эргэж пянзан дээр дуугаа хэвлүүлэх хандлага ихтэй болж байгаа юм. Өөр нэг зүйл бол үнэ цэнийг эрхэмлэгч нэгэнд шүтдэг хамтлагийнхаа дууг пянз тэр тусмаа алтан пянзанд мөнхлүүлэн авна гэдэг ховор завшаан билээ. Дэлхийн хамгийн шилдэг пянд хэвлэдэг 3 том компани байдаг. Үүний нэг болох Америкийн Лос Анжелст байдаг Эрика рекордст талын Монголын хөвгүүд алтан пянзаа хэвлүүлж дэлхийн сонорт монголын хөгжмийн хөгжлийг харуулсан. Энэ бол Хурд, энэ бол Хурдыг хорин жил сонссон эгэл монгол түмэн минь байлаа.
“Монголчууд” (XVII-XX зууны эхэн) түүхийн зурагт номын нээлт энэ сарын 30-ны 14:00 цагт “Интерном” номын дэлгүүрт болохоор товлогджээ. Энэхүү номыг монголчуудын түүхийн хамгийн чухал, нарийн судлагдаагүй “Манжийн үе” буюу XVII-XX зууны эхэн үеийн түүхийг түүхийн баримт, түүхэн дурсгалт газар нутаг, дурсгалууд, гар болон гэрэл зургууд, жуулчдын тэмдэглэл, элч нарын тайлан зэрэг арвин баримтад тулгуурлан бүтээсэн аж. Энэ үеийн түүх нь өнөө үед газар нутаг, улс үндэсний тусгаар тогтнолын асуудлын түүхэн улбааг танин мэдэхэд онцгой ач холбогдолтой нийт 1200 гаран гэрэл зураг, түүхийн баримт багтсан, түүх бичлэгийн хувьд онцгой ач холбогдолтой, шинэлэг хандлагаар бичигдсэн бүтээл юм.
Алтан хальс” холбооноос зохион байгуулсан “Алтан хальс” олон улсын андерграунд кино наадам өнгөрсөн амралтын өдөр Соёл урлагийн их сургуулийн “Оюутан” театрт болж өнгөрлөө.
Зургаадугаар сарын 25-нд буюу өнөөдөр поп хөгжмийн хаан Майкл Жексон хорвоо дэлхийг орхисноос хойш таван жил өнгөрч байна.
