МУГЖ дуучин Т.Ариунаа “Би мэргэжлийн дуучин” гэж ам бардам хэлдэг нь аргагүй. Монголын хамаг л нэр нөлөө бүхий дуучид төгссөн Болгарын Софи хотын Хөгжмийн дээд сургуулийн эстрад дуу дуулаачийн ангийг төгссөн ганц рок попын тогооны дуучин. Ерээд оны эхээр Болгарын хөгжмийн дээд сургууль төгсөж ирсэн Т.Ариунаа ёстой л задгай стилиэр олны анхааралд орон амархан нэрд гарч чадсан. Ам нь ч задгай, хувцаслалт нь ч задгай байж “эрос” стиль гэж юу байдгийг монголчуудад яруу тодоор харуулж өгсөн. Дуучин Т.Ариунаа нас нь ахихын хэрээр намба сууж, одоо цоглог, эрч хүчтэй дуучин, бас сайн гэрийн эзэгтэй. Нас нь 45 нас хүрч байгаа дуучин Т.Ариунаа наснаасаа хамаагүй залуухан харагддаг.
Уран бүтээлээрээ байнга тэсрэлт хийж, 20 гаруй жил олны анхааралд байгаа “топ” дуучин Т.Ариунаагийн нэрийг сонгосон хань нь нэлээн хэл аманд оруулдаг. Анх гэрлэхдээ дуулиантай эхэлсэн амьдралын шуугиан одоо ч тасраагүй. “Буяндорж секс машин”, “Дуучин Ариунаа нөхөр Буяндоржийгоо хардаад гуяыг нь хутгалжээ” гэсэн мэдээ 90-ээд оны сүүлээр байнга гарч, амьтан хүний чихийг дэлдийлгэдэг байв. Харин шинэ мянган гарснаас хойш дандаа л бизнес, мөнгөтэй холбоотой дуулианд Буяндорж орооцолдож, алдартай дуучин гэргийнхээ чихийг халууцуулдаг. Саяхан Буяндоржийг эрэн сурвалжилж байна, баригдлаа, хоригдлоо гэсэн шуугиан гарч, “Ноёд”-ын Буяндорж хоёр сар хоригдохоор болжээ гэсэн мэдээлэл цацагдаад шувтрав.
Ямартаа ч Т.Ариунаа үнэхээр нэр цуу нь түгсэн алдартай дуучин. Сүүлийн үед Рагу гэж Энэтхэг гаралтай, Сингапурын иргэншилтэй нөхөр рок попын тогоонд багтаж, “амьд бурхан” болоод байгаа. Тэрээр МУГЖ Ж.Алтанцэцэгийн “Просаунд” студид ажиллаж, “Universe best songs” наадмыг хамгийн удаан шүүж байгаа шүүгч. Манж зан гэдгийг мэддэггүй Рагу уралдаанд оролцсон хүүхдүүдийг улайтал үнэнийг нь нүүрэн дээр нь хэлчихдэг. Рагу, Ариунаа хоёр хоорондоо сайнгүй харилцаатай гэдэг. Саяхан Алтанцэцэгийн студи дээр Ариунаа, Рагу хоёр ярьж суугаад маргалдаж, Рагу “Чи хуурамч хүүхэн. Чи надад таалагддаггүй. Яг одоо эндээс гар. Би ажлаа хийлээ” гэж Рагу уурлаж, МУГЖ Т.Ариунаа юу ч хэлж чадалгүй нүдээ хэсэг анивчиж байгаад гараад явчихсан гэнэ. МУГЖ Т.Ариунаа Монголын поп дива дуучин, нэр хүндтэй хүн ч яагаад ч юм Рагуд хөөгдчихөөд өөдөөс нь юу ч хэлээгүй аж. Хэрэв Рагу Т,Ариунаагийн фенүүдийн дэргэд ингэж хэлсэн бол зодуулах байсан байхаа.
Эх сурвалж:tovchoo.mn
