Парис хотноо өнгөрсөн сарын 05-20-ний хооронд болсон ЮНЕСКО-гийн 37 дугаар Ерөнхий бага хурлын үеэр Монголчуудын оюуны болоод урлагийн үнэт өв болох есөн эрдэнээр урласан “Ганжуур” судрыг “Дэлхийн баримтат өв”-д бүртгэх шийдвэрийг гаргасан юм. Энэ үеэр тус байгууллагын Ерөнхий захирал Ирина Бокова Гадаад харилцааны сайд, ЮНЕСКО-гийн Монголын үндэсний комиссын дарга Л.Болдод “Есөн эрдэнийн Ганжуур” судрын “Дэлхийн баримтат өв”-д бүртгэгдсэн гэрчилгээг гардуулан өгсөн. Харин өнөөдөр уг гэрчилгээг Үндэсний төв номын сангийн Үнэт ховор номын музейд хүлээлгэн өгөх ёслол боллоо.
Тус үйл ажиллагаанд Гадаад харилцааны сайд, ЮНЕСКО-гийн Монголын үндэсний комиссын дарга Л.Болд, Соёл, спорт, аялал жуулчлалын дэд сайд М.Түмэнжаргал, холбогдох байгууллагуудын төлөөлөл болон бусад зочид төлөөлөгчид, Гандантэгчинлэн хийдийн тэргүүн хамба М.Чойжамц, Баруун хүрээ хийдийн хамба лам Дамбажав, хэлбичгийн эрдэмтэд зэрэг хүмүүс оролцлоо.
ЮНЕСКО-гийн Монголын үндэсний комиссын даргын хувиар Л.Болд хэлсэн үгэндээ “Өвөг дээдсийнхээ өв соёлыг дэлхийн өв болгон алдар хүндийг нь цууриатуулахын зэрэгцээ хадгалж, хамгаалах үүрэг хариуцлага бидэнд ирж байна” гэж онцолсон юм. Мөн Есөн эрдэнийн “Ганжуур”ыг дэлхийн баримтат өвд бүртгэсэн гэрчилгээг ЮНЕСКО арван нэгдүгээр сард олгосноос хойш Монголын “Монгол уран бичлэг”, “Монгол гэр урлал, зан үйл” маань биет бус соёлын өвд бүртгэгдсэнийг дурдаад энэ үйл хэрэгт олон жилийн турш мэдлэг оюун, цаг хугацаа, нөр их хөдөлмөрөө зориулсан эрдэмтэн судлаач, холбогдох бүх байгууллага, хүмүүст талархал илэрхийлсэн юм.
Үндэсний төв номын сангийн захирал Х.Чилаажав энэ үеэр онцлохдоо “Ганжуур”-ын гайхамшигт хувь болох есөн эрдэнийн бүтээл нь өнөөгийн бидэнд шашин шүтлэгээр дамжин сүм хийдүүдэд хадгалагдаж ирснийг дурдаж байлаа. Бурхан Шакьяамуни болон түүний шавь нарын туурвисан асар том судрын чуулган бөгөөд 110 боть энэ бүтээлийг монголчууд олон аргаар бүтээсний нэг нь есөн эрдэнээр урласан хэлбэр нь юм. Энэ нь тусгайлан боловсруулсан хар цаасан дээр алт, мөнгө, шүр гээд есөн эрдэнээр бичсэн хэрэг юм.
www.URLAG.mn
