Намайг чи уяруулж хөглөж
Намуун дуугаараа сэтгэл гижэгдэж
Нууцхан ч гэлээ өчүүхэн хугацаанд
Нүүрэмгий хөхүүн цагийг үдлээ
Үгсийн зөрүүгүй сэтгэл ханьсаж
Үдшийн чөлөөг баясаж өнгөрөөлөө
Хаврын үдшийн хайлган гэгээнд
Ханьсан алхаж чамайг түшихэд
Хаа холын мөрөөдөл биелэж
Хайрлах сэтгал намайг эзэмдэнэ
Гандуу зуны аагим халуунд
Ганцхан эгшинд бороо шаагисан шиг
Гундсан морины эмээлийг авч
Гурван өдөр сулд нь орхисон шиг
Энэхэн өдрүүдэд сэтгэл баясаж
Эгэлхэн амьдралд цэцэг ургалаа
Эрдэнэ олсон шиг хүсэл уужирч
Эр зүрх уярч гэгэлзлээ
Миний мэдэхгүй цаг хугацаа
Чиний өмнөөс тосон авна
Мишээж хөгжих энэхэн дүрээрээ
Чи зүрхний гүнд ургана
Цаг хугацааны зогсолтгүй урсгалд
Цал буурал бодол тосно
Цэл залуухан дүрээрээ чи
Цэн тогорууд ирэхэд мөнхөрнө
Сэнгэнэсэн агаар хаврын цас
Сэргэлэн дүрийг чинь үл мартуулна
Сэтгэл гэдэг хязгааргүй ертөнцөд
Сэртэл минь чи зугаалдаа хонгор минь
