Уран бүтээлч Ц.Жавзандулам “Javzaa art brand 01” бие даасан үзэсгэлэнгээ энэ сарын 24-нөөс “Mongol art” галерейн хоёрдугаар давхрын үзэсгэлэнгийн танхимд дэлгэх гэж байна. Уг үзэсгэлэндээ тэрбээр 30 гаруй шинэхэн бүтээлүүдээ толилуулах бөгөөд уран зураг болон интерьерийн гайхалтай хоршлыг харуулахаараа онцлог юм. Тодруулбал, үзэсгэлэнд орчин үеийн интерьерийн чиг хандлагад зохицох шинэлэг өнгө аяс, чөлөөт арга ажиллагаа, дүрслэл бүхий 30 гаруй абстракт зургуудаа дэлгэх юм.
Урлаг судлаач, куратор Б.Болортуяа “Уран зураг гэдэг зөвхөн гоо зүйн үзэмжээр хэмжигдэхгүй, түүнээс гадна тухайн орчинд зохицсоноор хүний сэтгэл зүйд амар амгалан, тав тухтай тайван, орон зайг бүрдүүлж төгс зохицох дотоод засал чимэглэлийн онцгой нэгэн хэсэг болдог гэдгээрээ онцлог юм. Тэр ч утгаараа Ц.Жавзандуламын энэ удаагийн үзэсгэлэнд тавигдаж буй уран бүтээлүүд орчин үеийн абстракт чиг хандлага тусгагдсан зохиомж, өнгө, олон янзын дүрс хэлбэр элементүүд бүхий үзэгчидэд өөр өөр мэдрэмж, утга санаа, төсөөллийн ертөнцийг бүтээх сонирхолтой үзэсгэлэн болно гэдэгт итгэлтэй байна.
Түүний уран бүтээлүүдэд хөнгөн, зөөлөн өнгөнүүд давамгайлах хийгээд зарим хэсгүүд дэхь тод өнгийн дүрс, хээний эсрэгцэл нь орон зайн гүнд уран бүтээлчийн сэтгэлзүйг илэрхийлж, зарим хэсгүүдэд чамин шигтгээ мэт хээ зурааслал, эрч хүчийг илтгэх дүрслэлийн оновчтой деталь, давтамж, хэмнэлттэй уусгалтууд орчин үеийн минималист болон модерн хэв маягийг илтгэнэ.
Уран бүтээлч өөрийн өнцгөөс орчин үеийн уран зургийг интерьерийн шийдэлтэй хослуулсан гэгээлэг, өнгөлөг, тааламжтай мэдрэмжийг төрүүлэх шинэ содон сонирхолтой уран бүтээлүүдийг урлагт хайртай үзэгчид та бүхнийг морилон саатаж, шимтэн үзэхийг урьж байна” гэжээ.
