Монголын урчуудын эвлэлийн гишүүн, уран барималч, керамик артист Н.Сүхбүрэн ХБНГУ-ын Дюссельдорф хотын “Хетженс керамик” музейн урилгаар тус улсад үзэсгэлэнгээ дэлгэж, хэлэлцүүлэг, ярилцлагад оролцон, олон улсын үзэгчдэд бүтээл туурвил болон урлахуйн эрдмээсээ хуваалцжээ. Мөн тус музейн үзмэрийн сан хөмрөгт бүтээлээ хадгалуулсан анхны монгол артист болсон байна. “Хетженс керамик” нь бүх цаг үеийн төлөөлөл болсон 20 мянга гаруй цуглуулгатай, 8000 жилийн түүхтэй, керамик урлалаар дагнасан Европын төв музей аж.
Тус музейнхэн энэ жилээс эхлэн Монголын уран бүтээлчдийн урлалыг сан хөмрөгтөө багтаахаар төлөвлөж, юуны түрүүнд керамикч Н.Сүхбүрэнг онцлон сонгожээ. Европын төв музейд уригдсан түүний хувьд дүрслэх урлагийн салбарт өөрийн байр суурь, өнгө төрхийг хэдийн олсон, манай шилдэг, залуу уран бүтээлчдийн төлөөлөл юм. Тэрбээр 2022 онд Итали улсын Кастелламонте хотод болсон, керамик урлалын 61 дэх удаагийн олон улсын консорциумд эх орноо төлөөлөн оролцсон билээ.
