ССАЖЯамны зүгээс Үндэсний цэцэрлэгт хүрээлэнд “Монголын Үндэсний Археологийн Музей”-г байгуулахаар төлөвлөж байгаа аж. Тиймээс ССАЖЯам тус музейн барилга, байгууламжийн макет, орчны зураг төслийг шалгаруулах нээлттэй уралдаан зарласан юм.
Энэхүү уралдаан нь ССАЖЯамнаас музейн эскиз зураг гаргах уралдааны эхнийх нь бөгөөд энэ ондоо багтаан Дүрслэх Урлагийн шинэ музей, Байгалийн Түүхийн Музей, Угсаатны Зүйн музейн аялал жуулчлалын цогцолбор гэсэн гурван музейн концепцийг бэлэн болгож эскиз уралдаан зарлах юм.
Яамнаас хагас жилийн хугацаанд “Монголын Үндэсний Археологийн Музей”-н концепцийг англи, монгол хэлээр гаргасан байна. Уг концепцийн хүрээнд археологийн музейнд зургаан танхим бүхий үзмэрүүд байрлах хэсэг шаардлагатай байгаа аж.
Үүнд:
1. Чулуун зэвсгийн үеийн үзмэр
2. Хүрэл зэвсгийн үеийн үзмэр
3. Төмөр зэвсгийн түрүү үеийн үзмэр
4. Хүннүгийн үеийн үзмэр
5. Уйгурын үеийн үзмэр
6. Эзэнт гүрний үеийн үзмэрийн танхим тус тус байрлах аж.
ССАЖЯ-ны сайд Ц.Оюунгэрэл "Хаана ч дэлгэгдэж чаддаггүй олон сайхан үзмэрүүд манайд байдаг. Гэтэл үүнийгээ бид музейн зориулалттай бус жирийн нэгэн гурван давхар байшинд аваачаад тавчихаж болохгүй юм. Тухайн үзмэртээ тохирсон байгууламж, гэрэлтүүлэг, тайз тавцан байснаар жинхэнэ утгаараа музейн үйл ажиллагаа явагдах ёстой. Мөн зураг төсөлгүй бол улсын төсвөөс мөнгө хувиарлах боломжгүй байдаг бөгөөд музейтэй болохын тулд бидэнд зураг төсөл, эскиз гаргах шаардлагатай байгаа юм. Тиймээс уралдааны тусламжтайгаар энэ ондоо багтаад эскизээ гаргаж ирэх оны төсөвт барилгынхаа үнэ өртөгийг шингээж оруулах бололцоотой болох юм" гэсэн юм.
ССАЖЯ-наас “Монголын Үндэсний Археологийн Музей”-н барилгын эскиз зураг шалгаруулалтын уралдаанд дотоод гадаадын компани, хувь хүн, уран бүтээлчдээс нийт 22 бүтээл ирсэн бөгөөд шүүгчдийн комиссын хурлаар 1-р байранд Барна Архитект ХХК, 2-р байранд С.Дэлгэр, Ж.Дэлгэрбаяр, О.Золзаяа нарын хамтын бүтээл, 3-р байранд С.Очир-Эрдэнэ нар тус тус шалгарсан юм. Харин өнөөдөр эдгээр шалгарсан уран бүтээлчдийг Ц.Оюунгэрэл сайд яаман дээрээ 9.30 цагт хүлээн авч уулзан, шагналыг нь гардуулан өгнө.
Холбоо барих утас: 99030651, 99832119, 88118075
www.URLAG.mn
