Монгол Улсын Хөдөлмөрийн баатар, Төрийн шагналт, Ардын жүжигчин Н.Сувдын 76 насны төрсөн өдөр өнөөдөр тохиож байна. Тэрбээр 1948 оны энэ өдөр буюу арванхоёрдугаар сарын 21-нд Төрийн соёрхолт, Соёлын гавьяат зүтгэлтэн Ц.Намсрай, Ардын жүжигчин Л.Цогзолмаа нарын ууган охин болон мэндэлжээ.
Н.Сувд 1970 онд ЗХУ-ын Бүх Холбоотын Кино урлагийн дээд сургууль (ВГИК)-ийг тайз, дэлгэцийн жүжигчний мэргэжлээр төгсөж, ажлын гараагаа “Монгол кино” үйлдвэрээс эхэлжээ. Улмаар 1973 оноос УДЭТ-т ажиллаж, тус театрын тайзнаа Оросын зохиолч Н.Островскийн “Инжгүй хүүхэн” жүжгийн Ларисагийн дүрээр анхлан гарч байв. Харин дэлгэцийн уран бүтээлд “Эхлэл” киноны Хорлоогийн дүрийг анх бүтээж, 1989 онд Төрийн шагналт, Урлагийн гавьяат зүтгэлтэн, нэрт найруулагч Б.Балжиннямын “Мандухай сэцэн хатан” кинонд бүтээсэн дүрээрээ Төрийн шагнал хүртсэн байна. Хамгийн сүүлд тэрбээр Б.Брехтийн “Сычуаны сайн хүн” гротеск драмын жүжгийн Хатагтай Ян, Л.Толстойн “Анна Каренина” сонгодог жүжгийн Аннагийн дүрээр театрынхаа тайзнаа гараад буй.
