Дорнод аймгийн Хөгжимт драмын театрын бүжигчин Д.Долгормаа Итали улсад болсон “Grand prix di Natale-2024” олон улсын уралдаанд тэргүүн байр эзэлжээ. Тэрбээр энэхүү уралдаанд 10 орны 120 гаруй бүжигчинтэй өрсөлдөн, Ө.Ариунбаатарын хөгжим, А.Санчирдоржийн дэглэлт “Зүүдний ганга” бүтээлийг тайзнаа толилуулсан байна.
Ташрамд дурдахад, Монгол Улсын Консерваторыг бүжгийн жүжигчин мэргэжлээр төгсөж, өдгөө Дорнод аймгийн Хөгжимт жүжгийн театрт зургаа дахь жилдээ ажиллаж буй бүжигчин Д.Долгормаа өмнө нь ЮНЕСКО-гоос зохион байгуулдаг “Танзолимп-2024” олон улсын уралдааны дэд байрт шалгарч, энэ 2025 онд Герман улсын Берлин хотод болох Дэлхийн бүжгийн олимпийн сүүлчийн шатны шалгаруулалтад оролцох эрхээ аваад буй юм. “Бүжиг дэлхийн хэл” хэмээх уриатай, Берлинд жил бүр зохион байгуулдаг эл бүжгийн наадам нь дэлхийн өнцөг булан бүрээс залуу бүжигчдийг цуглуулж, уралдаан, семинар зэрэгт хамруулдаг ажээ.
