Өнөө цагийн чадварлаг уран бүтээлчдийн нэг, тосон будгийн урлагт өөрийн өвөрмөц өнгө төрхийг бий болгосон зураач Х.Ууганбаяр бие даасан шинэ үзэсгэлэнгээ “Үүлэн дээрх мөр” нэртэйгээр дэлгэх гэж байна.
Энэхүү үзэсгэлэнд зураачийн дотоод сэтгэлийн аялал, ертөнцийг үзэх үзэл, гэгээрэл, хүний оршихуйн мөн чанарыг тусгасан сүүлийн үеийн онцлох бүтээлүүд багтжээ. Түүний уран бүтээлүүд нь бодит болон хийсвэр ертөнцийн заагийг бүдгэрүүлж, хүний дотоод ертөнц, оюун санааны нууцыг тайлахад урин дуудна.
Бясалгал, дотоод гэгээрэл, эрчим хүчний урсгал, орон зайн уялдаа холбоог харуулсан дүрслэл, амар амгалан, ертөнцийн зүй тогтол, бодит ба хийсвэр хослолыг Буддын гүн ухааны өнгө аяс бүхий дүрслэлээр харуулсан бүтээлүүд багтаж байна.
“Үүлэн дээрх мөр” үзэсгэлэн нь хүн төрөлхтний мөнхийн асуултууд болох “Би хэн бэ, хаанаас ирсэн бэ, хаашаа явж байна вэ” гэсэн эргэцүүллийг төрүүлэх бүтээлүүдээр бүрдсэн аж . Энэ бол зөвхөн харах биш, бас мэдрэх, сэтгэх урлагийн орон зай юм. Үзэсгэлэн хоёрдугаар сарын 18-наас гуравдугаар сарын 3-ныг хүртэл Монголын урчуудын эвлэлийн арт галерейд үргэлжилнэ.
