Уран бүтээлч, гэрэл зурагчин Б.Инжинааш “Meeting High” гэрэл зургийн бие даасан анхны үзэсгэлэнгээ Токио хотноо “OM system” галерейд дэлгэлээ. Түүний үзэсгэлэн “Залуу хот”, “Тайван хөдөө”, “Хөрөг”, “Миний дуртай зургууд” гэсэн дөрвөн хэсгээс бүрдэж буй. Үзэсгэлэн энэ сарын 14-нийг дуустал үргэлжлэх юм.
Б.Инжинааш 14 настайдаа Швейцарын хөгжлийн агентлаг, “Хүүхдийг ивээх сан”, “Монголын Урлагийн зөвлөл”-ийн санаачилгаар хэрэгжүүлсэн “Focus&Kids” гэрэл зургийн төслийн хальсны гэрэл зургийн дугуйланд суралцжээ. Улмаар 2007 онд “Гамма” агентлагийн гэрэл зурагчин болж Монгол, Япон, Орос, Чехэд хамтарсан үзэсгэлэн гаргаж байсан билээ.
Мөн 2016 онд олон улсын гэрэл зургийн “Магнум” агентлагийн тэтгэлгийн төлөө 100-гаад орны мянга гаруй гэрэл зурагчинтай өрсөлдөн шилдэг 15-д багтаж байсан зурагчин юм. Түүний бүтээлүүд “National Geographic”, “Time” зэрэг олон улсын хэвлэлд түүний бүтээлүүд нийтлэгдэж байжээ.
