Монголын Үндэсний музей соёлын биет бус өвийг олон нийтэд сурталчлан таниулах түгээн дэлгэрүүлэх зорилгын хүрээнд “Монгол туургатан хэл хуурын нийгэмлэг”-тэй хамтран “Нүүдэлчдийн хэмнэл хил хуур мину” түр үзэсгэлэнг өчигдөр /2025.04.09/ нээж, олон нийтэд 10 хоногийн турш үнэ төлбөргүй нээлттэйгээр үйлчлэхээр боллоо.
Монголчуудын төдийгүй дэлхийн олон үндэстний соёлын биет бус өвийн нэг, нүүдэлчдийн эртний язгуур өвөг хөгжим хэл хуур нь хийц, хөг аялгууны хувьд нэн сонирхолтой, сэргээн хөгжүүлэх шаардлагатай өв юм. Эдүгээ бидэнд мэдэгдэж буйгаар дэлхийн 160 гаруй оронд хэл хуур тархсан хийгээд тухайн үндэстний сэтгэлгээ, зан заншил уламжлалыг шингээсэн онцлогтой байдаг.
Монголчуудын хөгжмийн түүхийн маш сонирхолтой олдворыг 1989 онд нэрт археологич Ж.Цэвээндоржийн ахалсан судалгааны баг олж илрүүлсэн бөгөөд Төв аймгийн Морин толгойн Хүннү булшнаас уг олдвор илэрсэн түүхтэй. Тэгвэл энэхүү хэл хуурын хувилмал загвар, эртний баатруудын “Нуман хуур”, бууны сумны хонгиогоор хийсэн гуулин хуур түүнчлэн Австри, Франц, Япон, Хятад, Якут, Польш, Унгар, Тува зэрэг олон орны сонин содон хэл хууруудыг үзэсгэлэнгийн танхимд үзэх боломжтой.
Энэхүү үзэсгэлэн энэ сарын 18-ныг дуустал олон нийтэд нээлттэй ажиллах бөгөөд энэ үеэр олон нийт, үзэгч сонирхогчдод зориулан “Хулсан хуурыг урлахуй” боловсролын хөтөлбөр, “Хөгжимт зургийн сэтгэл засал” эвент, “Хэл хуур мину” танилцуулга сургалт, “Тод эгшиг хэмнэл” хөгжимт сэтгэл заслын боловсролын хөтөлбөр, “Өвлөн уламжлагчид бэ эртний хөгжмүүд” хэл хуурын тоглолт зэрэг олон үйл ажиллагаа болно.
