УДБЭТ-ын тайзнаа маргааш /2025.04.25/ Ж.Бизегийн “Кармен” дуурийг тоглоно. Дэлхийн сонгодог дууриудын нэг болсон энэхүү алдарт дуурьт театрын уран бүтээлчдээс гадна ОХУ-ын Буриад улсын театрын гоцлол дуучид дуулах болсноороо онцлог аж.
Буриад улсын Төрийн шагналт, Ардын жүжигчин, Бүх Оросын олон улсын уралдааны шагналт Ольга Жигмитова, Буриад Улсын Гавьяат жүжигчин Дамба Занданов нарын уран бүтээлчид манай улсад хүрэлцэн ирсэн байна. Тэд маргааш болох “Кармен” дуурьт Монголын уран бүтээлчидтэй хамтран оролцохоор болжээ. Мөн ирэх ням гараг /2025.04.27/-т хоёр орны гоцлол дуучдын “Гала” концерт болно.
Буриад улсын театрын уран бүтээлчдээс онцолбол, Ардын жүжигчин Ольга Жигмитова, Мунхзул Намхай, Галсан Ванданорв, Эдуард Жагбаев, Гавьяат жүжигчин Мэргэн Санданов, Билигма Ринчинова нарын уран бүтээлчид энэ удаагийн багт багтсан байна.
УДБЭТ-ын хамт олон 2025 онд өөрийн тайзнаа Буриадын Улсын дуурь бүжгийн эрдмийн театрын уран бүтээлчидтэй хамтран тоглох уран бүтээлүүдийн эхнийх нь Ж.Бизегийн “Кармен” дуурь, “Гала концерт” байх бол ирэх зургаадугаар сард П.И.Чайковскийн “Хунт нуур” балетад мөн тус театрын уран бүтээлчид тоглохоор болжээ.
ОХУ-ын Буриадын Улсын дуурь бүжгийн театрын тухай товч танилцуулахад 1939 онд байгуулагдаж, 1949 онд “Эрдмийн театр” цол авсан аж.
