Гэрэл зураг сонирхогч болон залуу гэрэл зурагчдын улсын анхдугаар уралдааны ялагчдыг өчигдөр тодрууллаа. Монголын түүх, нийгэм, соёлын онцлогийг харуулах, бүтээлч сэтгэлгээг хөгжүүлэх, гэрэл зургийн сан бүрдүүлэх зорилготой эл уралдааны шилдгийн шилдгээр гэрэл зурагчин Б.Жамъяндоржийн “Жанрайсаг” бүтээл шалгарчээ.
Харин шилдэг гэрэл зургаар Дорнод аймгаас оролцсон А.Анхбаярын “Хэрлэн голын үер”, Сэлэнгэ аймгаас оролцогч Б.Бүрэнбаатарын “Манай гэрт тавтай морил” зэрэг бүтээлийг тодруулсан байна. Мөн энэ төрөлд Б.Эрдэнэбатын “Найзууд”, А.Ахжолын “Гэмгүй зүрх”, Э.Батхүүгийн “Нарны алга”, Э.Мөнхчулууны “Аж байдал 2”, Б.Төрбатын “Нүүдэлчин” зургийг шилдгээр шалгаруулсан аж.
Уралдаанд нийт 1000 орчим бүтээл ирүүлснээс Улаанбаатар, баруун, зүүн, төв, хойд, хангай, говь гэсэн долоон бүсийн төрөлд тус бүр нэг гэрэл зургийг шилдгээр нэрлэсэн нь энэ юм. Соёл, спорт, аялал, жуулчлал, залуучуудын яам, Монголын гэрэл зурагчдын нэгдсэн холбоо хамтран 15-34 насны гэрэл зураг сонирхогч болон залуу гэрэл зурагчдын улсын анхдугаар уралдааныг хамтран зохион байгуулжээ.
