Монгол Улсын Тулгар төрийн 2234 жил, Их Монгол Улс байгуулагдсаны 819 жил, Үндэсний эрх чөлөө, тусгаар тогтнолоо сэргээн мандуулсны 114 жил, Ардын хувьсгалын 104 жилийн ой, мөн Өндөр гэгээн Занабазарын мэндэлсний 390 жилийн ойг тохиолдуулан зохион байгуулж буй “Өндөр гэгээний өв дүрслэх урлагт” тусгай үзэсгэлэнгийн нээлт уржигдар /2025.07.07/ боллоо.
Үзэсгэлэнг Г.Занабазарын нэрэмжит Дүрслэх урлагийн музей, Өвөрхангай аймгийн Эрдэнэ зуу музейтэй хамтран зохион байгуулж байгаа бөгөөд Өндөр гэгээн Занабазарын оюуны болон уран бүтээлийн өв, түүний дүрслэх урлагт оруулсан хувь нэмрийг олон нийтэд сурталчлан таниулах, өвлүүлэн үлдээх зорилготой юм.
Тус үзэсгэлэнд хоёр музейн сан хөмрөгөөс сонгогдон дэлгэгдсэн 130 гаруй үзмэр дэлгэгдэж байна. Онцлох үзмэрүүдээс дурьдвал, XVIII зууны “Жавзандамба хутагтуудын дүр” шүтээн зураг, “Занабазарын мутрын дардас”, “Хатан эх Ханджамцын хөрөг”, “Өндөр гэгээн” зэс хөөмөл баримал зэрэг бүтээлүүд байна.
Байршил: Г.Занабазарын нэрэмжит Дүрслэх урлагийн музей
Үргэлжлэх хугацаа: 2025.07.07 – 2025.07.28
Цагийн хуваарь: Даваа–Ням гарагт 09:00 – 17:30
