Үзэсгэлэнд Төрийн соёрхолт, ардын зураач До.Болд, Урлагийн гавьяат зүтгэлтэн Ц.Нарангэрэл, Урлагийн гавьяат зүтгэлтэн Б.Төмөрбаатар, Монгол Улсаас Герман улсад суугаа соёлын элч, зураач Ц.Ган-Эрдэнэ, СТА зураач С.Базарваань, барималч Т.Даваасамбуу нарын уран бүтээлчдийн 90 гаруй бүтээлийг дэлгэжээ.
HUE ART галерейн гүйцэтгэх захирал, зураач Б.Батжин, бид өнгөрсөн зургаадугаар сард олон улсын стандартад нийцүүлэн, Монголдоо жишиг болохуйц том галерей байгуулсан. Шилдэг уран зураач, урлан бүтээгчдийн бүтээлийг мэргэжлийн түвшинд хадгалж, худалдаалж, мөн нийтэд дэлгэж байна.
Он жил, цаг хугацаа өнгөрөх тусам уран бүтээлийн үнэ цэн нэмэгддэг. Тэр ч утгаар сайн уран бүтээлийг хадгалж, олонд таниулах нь чухал ач холбогдолтой. Олон улсын жишгийн дагуу бид кассетин ханануудад зургаа хадгалж байна. Зургийг давхарлаж хадгалбал гэмтэнэ,чийгтэй, нартай газар хадгалах нь бүтээлийн насжилтад сөргөөр нөлөөлдөг. Тийм учраас сайн уран бүтээлийг зохих ёсоор хадгалж нийгмийн соёл, хариуцлагын хүрээнд олон нийтэд хүртээн ажиллаж байна.
Энэ удаагийн “Хүрээлэн буй Хязгааргүй” үзэсгэлэнд гурван үеийн төлөөлөл болсон шилдэг зураач, барималчид өнгөний тоглолт хийж бүтээлээ дэлгэлээ.
Бид цаашид сар бүр чанартай нэг үзэсгэлэн гаргах төлөвлөгөөтэй. Есдүгээр сард Увс аймгаас төрсөн уран бүтээлчдийн үзэсгэлэнг толилуулна гэв.
Бодит реалист зураг, орчин үеийн абстракт, модерн чиглэлийн бүтээл, баримал зэрэг төрөл бүрийн урсгалыг нэг дор багтаасан тус үзэсгэлэн есдүгээр сарын 18-ныг хүртэл үргэлжлэх аж.
