Монгол Улсын Соёлын гавьяат зүтгэлтэн, зураач С.Борхүүгийн “Домог амилсан говь” үзэсгэлэнг “Монгол арт” галерей ирэх арваннэгдүгээр сарын 1-10-нд дэлгэнэ.
Уг үзэсгэлэнд С.Борхүү агсны 40 гаруй бүтээл, түүний хүү, МУЭ-ийн гишүүн, зураач Б.Чулуунбаатарын 20 гаруй уран бүтээлүүдийг хамтатган дэлгэх аж.
С.Борхүү агсан хүүгийн хамт 20 гаруй жилийн турш судалбар зургийн аяллууд хийж, нутагтаа уран зураг, Монгол зургийн үзэсгэлэнгүүдийг зохион байгуулж, мөн Монголын анхны элсэн баримлын бүтээлүүдийг туурвиж байв.
1951 онд Өмнөговь аймгийн Ханхонгор суманд төрсөн тэрээр аймаг, орон нутгийн урлагийн салбарт үнэт хувь нэмэр оруулсан зураач байсан бөгөөд “Бидний бага нас” бүтээл нь Монголын Уран Зургийн Галерейд хадгалагдаж, “Миний сайхан ээж”, “Монголын үнэн”, “Фронтод өгөх бэлэг” зэрэг бүтээлүүдээрээ Монголын уран зурагт өөрийн мөрөө үлдээсэн билээ.
“Домог амилсан говь” үзэсгэлэн говийн гайхамшигт байгаль, ард түмний дүр төрх, уламжлал, үлгэр домгийг дахин амилуулан уран зургийн хэлээр хүүрнэх болно.
Үзэсгэлэнг Өмнөговь аймгийн ИТХ, Өмнөговь аймгийн ЗДТГ, Өмнгөговь аймгийн Соёл урлаг, аялал жуулчлал, залуучуудын газар, Даланзадгад сумын ЗДТГ, Монголын урчуудын эвлэлийн Өмнөговь аймаг дахь салбар ивээн тэтгэж, дэмжин ажиллаж байна.
