“Соёл түгээе” уриан дор зохион байгуулагдаж буй “Соёлын орон зай – Бидний орчин” бүтээлч аяны хүрээнд соёлын өвийг орон нутагт сурталчлан таниулах, музей хоорондын хамтын үйл ажиллагааг өргөжүүлэх, харилцан туршлага солилцох, орон нутгийн хүүхэд залуучуудын танин мэдэхүйг нэмэгдүүлэх зорилгоор Г.Занабазарын нэрэмжит Дүрслэх урлагийн музей нь Өмнөговь аймгийн Говийн байгаль, түүхийн музейтэй хамтран “Монголын нэг өдөр” нүүдлийн үзэсгэлэнг зохион байгуулж байна.
XX зууны эхэн үеийн Монголын дүрслэх урлагийн нэрт төлөөлөгч, зураач Балдуугийн Шаравын “Монголын нэг өдөр”, “Үрс гарч байгаа нь” хэмээх хосгүй үнэт бүтээлийн хэвлэмэл зургийг арваннэгдүгээр сарын 5-ныг хүртэл хүртэл үзэгч олны хүртээл болгож байна.
Тус үзэсгэлэнд морилон саатсанаар “Монголын нэг өдөр”, “Үрс гарч байгаа нь” бүтээлүүдийн өнгө төрх, өгүүлэмж, дүр дүрслэл орчин үеийн гэрэл зургийн хальсанд хэрхэн буусан байдлыг сонирхон үзэхийн зэрэгцээ бүтээлд багтсан хүмүүс, мал амьтан, эд өлгийн зүйлс, зан үйлийн дүрслэлүүдийн нарийвчилсан тоо баримттай дэлгэрэнгүй танилцах боломжтой.
