Залуу уран бүтээлч, архитектор Т.Эрдэнэ-Очирын анхны, бие даасан “Амь цаас” үзэсгэлэнг Г.Занабазарын нэрэмжит Дүрслэх урлагийн музейд өчигдөр /2026.01.16/ нээлээ.
Үзэсгэлэнд монгол нүүдэлчдийн амьдралын хэмнэл, цаг хугацаа, ухаан бодол, алсын харааг оносон зохиомж, нарийн мэдрэмж, өөрийн гэсэн арга ажиллагаагаар холбон сэдэв, санаа агуулгын хувьд сонирхолтой байдлаар бүтээсэн уран хайчилбарын 120 гаруй бүтээл багтжээ.
Уран бүтээлч Т.Эрдэнэ-Очир ярихдаа,“Уламжлалт хайчилбарыг өөр өнцгөөс харуулахыг хичээсэн. Хайчилбарыг нэг хэв маягаар ойлгох нь их байдаг. Түүнийг жаахан задлаад, орчин үеийн урлагийн хэлбэр, мэдрэмж рүү ойртуулахыг зорьсон” хэмээн онцлов.
Мөн тэрбээр, “Хайчилбар нь нэг л өнгөөр хийдэг онцлогтой урлаг. Тэр дундаа негатив, позитив хоёрын харьцааг яаж зөв зохиох вэ гэдэг нь хамгийн чухал. Нэг цаасан дээр бүх санаа, зохиомж, тэнцвэр нь багтдаг болохоор их нарийн мэдрэмж шаарддаг. Олон улсад цаасан хайчилбар бие даасан урлагийн төрөл болж хөгжиж байна. Бүтээл хийхдээ эхлээд санаагаа их удаан бодож, эскиз гаргадаг. Хамгийн их хугацаа авдаг нь хийх үйл явц биш, харин яг тэр санаагаа олж, бүрэн гүйцэд гаргах тэр хэсэг байдаг. Бүтээл болгон дээрээ өөрийн гэсэн характер, дүр төрх гаргахыг оролддог” гэв.
Т.Эрдэнэ-Очир архитекторын мэргэжилтэй, цаасан хайчилбарын төрлөөр 10 гаруй жил уран бүтээлээ туурвиж байна.
Энэхүү олон давхар дүрслэлтэй, шувуу шиг харагддаг бүтээл галт шувууг зохиомжлон хийсэн байна. Уг бүтээлээ хийхдээ шувууг аль болох хүчтэй, эрчтэй мэдрэмжтэй гаргахыг зорьж, дотоод эрч хүч, хөдөлгөөнийг харуулжээ.
Уг үзэсгэлэн энэ сарын 25-ныг хүртэл олны хүртээл болно.
