АНУ-ын Нью-Йорк хотын Гималайн урлагийн Рубин музей болон Сапар контемпорари музейн сан хөмрөгт хадгалж буй бүтээлүүдээс бүрдсэн үзэсгэлэн Атланта хотын Оглеторп их сургуулийн урлагийн музейд дэлгэжээ.
Энэхүү үзэсгэлэнд “Монгол зураг” нийгэмлэгийн уран бүтээлч Д.Үүрийнтуяагийн тус музейд хадгалж буй “Backstage”, “Floating World” зэрэг бүтээл олны нүдийг хужирлаж, Монголын орчин үеийн дүрслэх урлагийг олон улсын үзэгчдэд толилуулж байна. Энэхүү үзэсгэлэнд Монгол, Балба, Төвөдийн уламжлалт хуйлмал болон эд зүйлс, Д.Үүрийнтуяагийн орчин үеийн зургууд, OUMA-ийн өөрийн Азийн урлагийн цуглуулгаас авсан бүтээлүүд, түүний дотор OUMA-д зориулж шинээр захиалсан зураг багтжээ.
Д.Үүрийнтуяагийн хувьд монгол зургийн хэв маягийн орчин үеийн мастер юм. Уламжлалт монгол болон буддын шашны хээ угалзыг орчин үеийн сэдэвтэй хослуулсан түүний бүтээл нь эмэгтэйчүүдийн амьдрал, нүүдэлчний дараах Монголын өдөр тутмын амьдралын хэмнэлд төвлөрдөг. Тэрбээр XXI зууны Монголын бодит байдлыг тусгахын тулд уламжлалыг дахин төсөөлдөг аж. 2001 онд оюутан байхдаа үзэсгэлэн гаргаж эхэлсэн түүний бүтээлүүд нь Даллас хотын Урлагийн музей, Оберлин коллежийн Аллены дурсгалын урлагийн музей, Австралийн Квийнсландын урлагийн музей, Японы Фүкүока Азийн урлагийн музейн цуглуулгад байдаг ажээ.
