Баянхонгор аймгийн аварга жолооч н.Пүрэвдагва гэж хүний эдэлж байсан сийлбэртэй шүрэн хөөрөг бол аймгийн музейн онцлох үзмэрийн нэг. Энэхүү хөөрөг нь шүр Монголд ургадаггүй, мөн ийм том хэмжээтэй олддоггүй учраас нэлээд ховор үзмэрт тооцогддог байна.
Тус хөөргийн хажуу бөөрөн дээр ямар нэг амьтан дүрсэлсэн мэт харагддаг нь содон. Хэзээ, хаана, хэрхэн урласан болох нь тодорхойгүй эл хөөрөг хэмжээ, хийцээрээ аймгийн музейд хадгалагдаж буй хөөргүүдээс ялгардаг.
Шүрийг зөнч мэргэдийн сахиусан чулуу гэх бөгөөд атаа жөтөө, хар хорын сэтгэлийг зайлуулж, муу бүхнээс хамгаалдаг гэж үздэг. Аянга цахилгааныг зайлуулдаг, ой тогтоолтыг сайжруулдаг, шарх сорви, ярыг эдгээн, хоолойн өвчнийг анагааж, хордлого тайлдаг тустай төдийгүй төрөх гэж буй эх цагаан шүрэн хөөргийг алганы хээгээр үрэхэд хүндрэлгүй төрдөг гэх яриа ч бий. Тиймээс хөөрөг дотроос шүрэн хөөрөг хамгийн үнэтэй нь бөгөөд шүр нь баяр баясгалан бэлэглэх бэлгэдэлтэй байдаг байна.
Хөөрөг бол монголчуудын зан үйлийг илэрхийлдэг нэг гол гоёл. Монголчууд уламжлалт ёсоороо мэндлэхдээ хөөргөөр тамхилдаг эртний заншилтай. Тэр бүр хөөрөг хэрэглэхээ больсон суурин газрынхан өдгөө сар шинийн баяраар хөөргийг хүндэтгэн хэрэглэж, бие биетэйгээ амар мэнд мэддэг болжээ.
Хөөргийг бүтээсэн он цаг: XX зууны эхэн үе
Материал: Шүр, хув, яс, гууль, сийлбэр
Хэмжээ: 11х7.2 см, 385 гр
