Монгол хэл, бичиг үсгийг сурталчлан түгээн дэлгэрүүлэх зорилготой “Үндэсний бичиг үсгийн баяр” тавдугаар сарын 3-нд тохионо. Үүнтэй холбогдуулан Архивын ерөнхий газар болон Монголын Үндэсний музей хамтран “Монголчуудын үсэг бичиг, утга соёлын өв” тусгай үзэсгэлэнг олон нийтэд дэлгэн үзүүлнэ.
Тус үзэсгэлэнгээр монголчуудын бичиг үсгийн түүхэн уламжлал, утга соёлын өвийг харуулсан архивын сан хөмрөгт хадгалагдаж буй уг эх бичиг, гэрийн үеийн бичмэл, газрын зураг, захидал харилцааны 100 орчим баримтыг дээжлэн толилуулж буйгаараа онцлог юм.
Мөн Монголын Үндэсний музейн сан хөмрөгөөс XVII-XX зууны үед хамаарах монгол бичгийн ховор сонирхолтой дурсгалуудыг дэлгэжээ. Үүнд үйсэн номын хэсэг, тамга, бичгийн хэрэгсэл болох бийр, бэх, үнсэн самбар, бичгийн ширээ зэрэг үзмэрүүд багтсан байна. Үзэсгэлэн Монголын Үндэсний музей-н үзэсгэлэнгийн танхимд тавдугаар сарын 1-ний 11:40 цагаас нээлтээ хийсэн бөгөөд энэ сарын 7-ныг дуустал олон нийтэд нээлттэй ажиллах аж.
