УДБЭТ-ын уран бүтээлчид ирэх амралтын өдрүүд буюу тавдугаар сарын 9, 10-нд Х.Билэгжаргалын “Ламбугайн нулимс” дуурийг толилуулах гэж байна.
Их зохиолч Д.Нацагдоржийн “Ламбугайн нулимс” зохиолоос сэдэвлэн бүтээсэн энэхүү гурван бүлэг, зургаан үзэгдэлт эл дуурийн цомнолыг Төрийн шагналт, Ардын уран зохиолч Б.Лхагвасүрэн бичиж, Урлагийн гавьяат зүтгэлтэн Л.Эрдэнэбулган найруулсан юм. Тайзнаа анх 1986 оны тавдугаар сарын 10-нд тоглосон бөгөөд Урлагийн гавьяат зүтгэдтэн Ж.Бүрэнбэх удирджээ.
19 дүгээр зууны Монголын бодит амьдралаас харуулдаг энэхүү дуурь нь хөгжмийн бүтээлийн хувьд УДБЭТ-ын тайзнаа тоглогдож буй үндэсний шилдэг дууриудын нэг юм.
Бурхны үнэнч зарц гэвш Лодон нэгэн өдөр санамсаргүй учирсан Цэрэнлхам хүүхэнд ухаангүй дурлан сэтгэл зүрх, эд хөрөнгөө харамгүй зориулна. Гэвч Цэрэнлхам зальжин, шуналт эхийнхээ зөвлөснөөр нэгэнт эхнэр авах боломжгүй лам хүний хайр сэтгэлийг хөсөр хаяж баян залуутай заяа холбохоор шийднэ. Үүнийг мэдсэн Лодон гэвш шаналан уйлан гуйвч номын ёсыг зөрчсөн нь түмэн олноо илж болсон тул муу нэр зүүн, олны доог болсоор хүрээний гудамжинд уйлан үлдэнэ.
