Гадаа нартай байвч
Бороо орохыг таашгүй
Галтай залуу байвч
Үхэл ирэхийг таашгүй
Авдраар дүүрэн мөнгө байвч
Хулгай авахыг таашгүй
Амраг сэтгэлийн хань байвч
Урваад явахыг таашгүй
Ширүүн урсгалт гол байвч
Хатаж ширгэхийг таашгүй
Шим сайтай өвс байвч
Хагдарч унахыг таашгүй
Гил хархан үс байвч
Гандаж цайрахыг таашгүй
Гэрэл цацарсан нүд байвч
Гал нь бөхөхийг таашгүй
Найз нөхдөөр хахаж байвч
Ганцаар үлдэхийг таашгүй
Найрсаг сайхан загнаж байвч
Хохироож орхихыг таашгүй
Ярайсан цагаан шүд байвч
Буйл нь үлдэхийг таашгүй
Ямба хэргэм цол байвч
Буурч муудахыг таашгүй
Цэцэг найгасан хөндий байвч
Цасаар хучигдахыг таашгүй
Сэтгэл татам бүсгүй байвч
Насанд дарагдахыг таашгүй
Энгэрээр дүүрэн одон байвч
Зэвэнд идэгдэхийг таашгүй
Тэнгэрээр дүүрэн одод байвч
Харваад одохыг таашгүй
Хөрсөнд нуугдсан баялаг байвч
Хоосроод үлдэхийг таашгүй
Хөрөнгө зоорь арвин байвч
Гуйлга гуйхыг таашгүй
Уйлаад барамгүй зовлон байвч
Жаргал ирэхийг таашгүй
Өөлөөд дуусамгүй зүдрэл байвч
Хөгжил ирэхийг таашгүй
Мартагдсан гэгээн аялгуу байвч
Чихэнд эгшиглэхийг таашгүй
Маргааш юу болохыг чи ч би ч таашгүй
www.URLAG.mn
