Их Британийн дуучин Сэм Смит урт хугацааны хамтрагч, загвар зохион бүтээгч Кристиан Коуэнтай сүй тавьснаа албан ёсоор зарлажээ. Энэ тухайгаа тэд “The New York Times” сонинд өгсөн ярилцлагынхаа үеэр хуваалцсан байна.
Хосууд ойролцоогоор гурван жилийн турш үерхэж байгаа бөгөөд энэ мэдээ нь Сэм Смитийн тав дахь студийн цомог болох “Hazel Eyes” наймдугаар сарын 21-нд худалдаанд гарахын өмнө нийтэд ил болсон юм.
Сэм Смитийн хэлснээр, цомгийнхоо нэрийг сүйт залуу Кристиан Коуэны бордуу ногоон нүднээс санаа авсан аж. Мөн тэрбээр шинэ цомгийнхоо анхны дуу болох “Everlasting Love”-ийг Кристиан Коуэнтай анхны болзоондоо явахаас өмнөх орой бичиж эхэлсэн бөгөөд тэдний харилцаа хөгжихийн хэрээр уг бүтээлээ дуусгасан гэж ярьжээ. Сэм Смитийн хувьд энэ нь уран бүтээлдээ харилцан хайр сэтгэлийн тухай өгүүлсэн анхны дуу болсон байна.
Одоогоор хосууд хуримын тов болон сүй тавьсан үйл явдлынхаа талаар дэлгэрэнгүй мэдээлэл өгөөгүй байна.
