Нэг хэсэг Мүүн гэгчийн талаар шуугиж мэдээгүй заримынх нь хувьд нүдийг нээж өгсөн цэнхэр үст Цэрэнд баярлаж байгаа хүмүүсийн нэг билээ би. Тэр утгаараа ч дэмжиж буйгаа удаа дараа илэрхийлж бичиж байсаан. Харин сүүлд Бавуугийн Лхагвасүрэн гуайг Мүүнчин болгоод байгаа бололтой юм даг уу даа. Хүн бүр тэр Мүүн гэгчийн талаар мэдээлэл байхгүй байж байгаад л энх тайван гэсэн гоё сайхан уриа лоозонд итгээд хэдэн төгрөг өгөхөөр нь юм бичсэн байж болно шүү дээ.
Байнга л магтаад бичээл байгаагүй л байлгүй дээ Лхагвасүрэн гуай.
Хийж бүтээсэн зүйл ихтэй хэдэн өвгөд хөгшидөө тайван байлгах хэрэгтэй юм гэж л сананам. Хувь хүний тухай ойлголт, авьяас чадварын тухай ойлголт бол хоёр салангид зүйл шүү дээ. Бүх хүн бурханлиг бишийн учир бид бүгдэд л сайн муу, сайхан муухай чанар, амны алдаа бүгд байдаг даа. Амьддаа гүтгүүлж, шоронд хатаж зовсон Чойномыг ч тэр, амьд атлаа боорлуулах хэнийг ч тэр нэмж боорлохыг барьж идэж, үгүйсгэхийг үл хүснэ. Тэр бол жудаггүй л зан.
Энэ хүн түмэн олон хадаг яндар барьсан шавьтай, би хувьдаа хэнд ч хадаг яндар өргөж шавь орж байсангүй ээ.
Тиймээс багшийгаа өмөөрч, эсвэл бялангачилж байна гэх зүйл огт байхгүй ээ надад. Хувь хүний талаасаа ярих юм бол миний авга ах Дашбалбартай таарамжгүй байдаг байсан л хүн. Тэглээ гээд тэр насаараа буруутгагдах, эсвэл үзэн ядагдах ял биш байхаа. Хэн нэгэндээ дуртай, дургүй байх гэдэг бол жижиг хэрэг. Хэн нэгнийхээ хийж бүтээснийг хүртэл үгүйсгэж нулимах гэдэг бол мулгуу хэрэг. Энд хувь хүнийг бус, хүний жудаг яригдах ёстой. Муулж чаддаг ам бас сайныг нь ярьдаг чадвар сэтгэлтэй байх хэрэгтэй.
Өвгөн найрагчийг тайван орхио Цэрэн минь.
Мэдээгүй хийсэн зүйл гэж энэ орчлонд бишгүй байдаг шүү…
Хувь хүн бие биендээ дуртай дургүй асуудал нэг өөр, хүний жудаг гэгчийн асуудал бас нэг өөр хэрэг байдаг шүү. Ялгаж салгаж амьдарч сурах хэрэгтэй юм даа бид. Хүний бүхий л зүйлийг харлуулах хэрэг байхгүй ээ. Тэртээ тэргүй хар ч цагаан холилдоогүй хүн энэ орчлонгоос олохгүй л болов уу. Ер нь бол бид бүгд саарал л өнгөтэй шүү дээ ккк. Хувь хүнд нь дургүйцэж болох ч хийсэн бүтээсэнд нь дурлаж хайрламаар хүмүүс бишгүй байна энэ орчлонд чинь. Энэхүү бичвэрээ зориуд авга ах, алдарт яруу найрагч, төрийн соёрхолт Монгол түмний эрхэм эх оронч хүү Очирбатын Дашбалбар ахынхаа
Амьддаа бие биенээ хайрла хүмүүс ээ
Алив сайхнаа бусдаас битгий харамла
Өлгий авс хоёрыг хүн бүхэн дамждаг болохоор
Өөр юу ч хэрэггүй бие биенээ хайрла гэсэн гэгээн сайхан мөртүүдээр өндөрлөмүү.
Яруу найрагч Хулганайн Тэргэл. 2016 он. Чикаго хот
