Орчлонд чамайгаа мэндлэхэд
Орь залуу насаа чамдаа бэлэглэсэн
—Үнэгчлэн нойрсох чамайгаа хараад
—Үүлэн сүүдрээс харамлан энхрийлдэг
Саваагүйтэн дэрвэх тоолонд чинь
Салаа гэзэг минь шингэрнэ
—Уйлж инээж бид ойлголцоно
—Уруул давсаныг давтан шулганах үр
Ээжээ гэж дуудах цангинаанд
Элэг зүрх минь уярч хайлдаг
Эр болж өслөө ч чи минь
Эрт орой ч манцуйтай хэвээрээ
— Сүү үнэртсэн сэвлэгийг чинь
— Сэтгэл зүрхэндээ үнэрлэн санадаг
— Сайн хүн болгох л гэсэндээ
— Санасан бодсоноо нуулгүй зэмлэдэг шүү
Авъяас билэг чинь ундарч
Алдарт цойлох үе бий, бүү сага
Аминаас үнэтэй үр минь чи наддаа
Аглаг ууланд ургасан ганган сарнай шүү
— Баатрын гавъяа байгуулахад чинь
— Бусдаас харамлан би өмөлздөг
— Бүүвэйлж суусан үеэ дурсахад
— Бяцхан чи минь алган дээр тарвалздаг
Хальтарч бүдэрсэн ч бүү сөгд
Ханцуй шамлан тэмцэж бос
Хамаг олноо туслаж тэтгэн
Хорвоод удмаа үлдээхийг хүсдэг
— Эх орондоо үнэнчээр зүтгэхийг хүсдэг
— Элгэн садандаа үлгэрлэхийг хүсдэг
— Эцэг өвгөдөө дээдлэхийг хүсдэг
— Ээждээ ирж үнсүүлэхийг хүлээдэг
Аав ээжээрээ дутах цагт
Алаг үрс чинь нөхдөг юм билээ
Амьдрал дандаа боломж хайрладаг юм шүү
Алдаж үл болно чанга атгаарай
— Хүний хүүхдээр хань хийхдээ
— Хүйн холбоотой ижийгээ санаарай
Эх орноо удирдаж жолоодовч
Эрхийн чинээнд бодогдох үр минь
— Манцуйтай байхдаа минийх ч
— Маргааш чи эх орны цэрэг
Хэвлийд бойжсон үр минь
Хэзээч Эх Орноосоо бүү урваарай
С.Нямжав
2013 он
